18/08/2014 15:44:41

LIGJET QË BLLOKUAN REFORMAT

Asnjë konfirmim për ligjin e ndarjes territoriale, ndërsa të tjerët do të votohen në shtator

TIRANË - Dekretet e Presidentit që kthejnë për rishqyrtim në Kuvend disa ligje të miratuara në seancën e 31 korrikut do të jenë ndër çështjet e para që pritet të diskutohen në nisje të sesionit parlamentar të vjeshtës, që hapet në fillim të shtatorit.

Nishani ktheu për rishqyrtim 4 ligje, (tre brenda një dite), të miratuara me votat e maxhorancës së majtë, në seancën e 31 korrikut. Ligji “Për Shkollën e Magjistraturës”, ligji “Për Policinë e Shtetit”, ndryshimet në ligjin për Këshillin e Lartë të Drejtësisë dhe ato “Për Gjykatën Administrative”.

Me Kushtetutë, Presidenti i Republikës ka të drejtë ta kthejë ligjin për rishqyrtim vetëm një herë. Maxhoranca, përmes kryeministrit Edi Rama tha se Parlamenti do ta kalojë sërish ligjin “Për Policinë”, pa asnjë ndryshim. "Reforma nuk ndalet", shkruan Rama në FB.

Në argumentat e parashtruar në dekretin që kthen ligjin “Për Policinë” presidenti është kundër kalimit të kompetencave të ruajtjes së personaliteteve nga Garda tek policia, varësinë e Policisë së Shtetit direkt tek Ministri si dhe krijimin e Byrosë Kombëtare të Hetimit, një strukturë që synon të forcojë luftën kundër korrupsionit, por që sipas Nishanit krijon një paralelizëm me prokurorinë dhe policinë gjyqësore.

Një tjetër ligj i kthyer në parlament është ai “Për funksionimin e KLD-së”, i cili kundërshtohet nga presidenti, në atë që lidhet me kufizimin e përzgjedhjes së kandidatëve për nënkryetar, vetëm mes tre anëtarëve të Këshillit, të propozuar nga Parlamenti.

Po kështu, në ndryshimet për gjykatat administrative, presidenti nuk bie dakort me kompetencat që i njihen kancelarit për emërimin e shkarkimin e ndihmësave ligjorë, duke qenë se kancelari është një figurë nën varësinë e ministrit të drejtësisë.

HermesNews - ©2014

Dërgo me email | Stampo artikullin