13/08/2014 18:33:16

Respektoni rregullat e qarkullimit rrugor

Vetëm gjatë periudhës 1 qershor – 10 gusht në pikat e Kalimit Kufitar kanë hyrë dhe dalë në territorin shqiptar 1.089.604 automjete

TIRANË - Ministria e Brendshme ka bërë thirrje sot për respektim të rregullave të qarkullimit rrugor.

Pas rasteve të aksidenteve rrugore në ditët e fundit, MB njofton se, “është duke ndjekur me seriozitet zbatimin e planit të masave nga ana e Policisë së Shtetit për garantimin e jetës dhe shëndetit nga aksidentet rrugore”.

“Sezoni turistik ka sjellë një shtim shumë të madh të fluksit të lëvizjes në akset rrugore kombëtare, por edhe urbane. Ardhja e shtetasve shqiptarë që jetojnë e punojnë në vendet e tjera apo edhe i një numri të lartë turistësh të huaj ka bërë që numri i automjeteve në rrugë të jetë shumë herë më i lartë”, thekson MB.

Sipas MB, “vetëm gjatë periudhës 1 qershor – 10 gusht në pikat e Kalimit Kufitar kanë hyrë dhe dalë në territorin shqiptar 1.089.604 automjete”.

Ministria e Brendshme u bën thirrje qytetarëve, e në mënyrë të veçantë drejtuesve të automjeteve, të bëjnë kujdes në rrugë dhe të zbatojnë me përpikmëri rregullat e qarkullimit rrugor, për të shmangur çdo rrezik për jetën dhe shëndetin e tyre. “Efektivi i Policisë së Shtetit është 100% në detyrë për të garantuar sigurinë e qytetarëve, ndërkohë që siguria e jetës nis nga përgjegjshmëria e çdo qytetari për të zbatuar rigorozisht rregullat e qarkullimit rrugor”, thekson MB.

Policia e Shtetit, shton MB, “do të vazhdojë të jetë në krye të detyrës me shërbime të përforcuara, për të ndëshkuar çdo shkelës të ligjit e për t’iu ardhur në ndihmë qytetarëve në çdo moment”. Në të njëjtën kohë, Ministria e Brendshme fton të gjithë qytetarët të kontribuojnë për sigurinë e përbashkët, duke sinjalizuar e denoncuar çdo rast të shkeljes së ligjit dhe rregullave të qarkullimit rrugor.

HermesNews - ©2014

Dërgo me email | Stampo artikullin