11/08/2014 17:46:18

Surpriza Albpetro

Rritja e prodhimit ditor të naftës nga puset, mirëadministrimi më i mirë i shpenzimeve, eficenca e burimeve njerëzore, treguesit financiarë dhe teknikë, ndikuan në këtë rezultat

TIRANE - Në periudhën Janar-Qershor kompania publike e nxjerrjes së naftës, “Albpetrol” sh.a derdhi në buxhetin e shtetit 1,2 miliardë lekë, ose 63% me shumë se e njëjta periudhë e vitit të kaluar. Rritja e prodhimit ditor të naftës nga puset, mirëadministrimi më i mirë i shpenzimeve, eficenca e burimeve njerëzore, treguesit financiarë dhe teknikë, ndikuan në këtë rezultat, bëjnë të ditur burimet zyrtare të kompanisë.

Sipas tyre, nga muaji shtator 2013 deri sot, prodhimi i naftës nga “Albpetrol” është rritur 41% më shumë. Nga 80.5 ton/ditë naftë e nxjerrë vjet, ka arritur në 6 muajt e parë në 127.2 ton naftë/ditë, pasojë e rritjes së numrit të puseve aktive të nxjerrjes së naftës. Kështu nga muaji tetor 2013 kur vetëm 786 puse ishin aktive për prodhim në “Albpetrol”, sot kanë arritur në 874 puse nafte aktive.

“Albpetrol” ka përfunduar ristrukturimin e shoqërisë dhe nga 2.894 punonjës, që ishin në Tetor 2013, sot ka në punë 1950 punonjës, ndërsa ka ringritur strukturat studimore dhe ka aktivizuar projekte madhore, sikurse është projekti i gazit të Dumresë.

Me paketën e re fiskale që hyri në fuqi më datë 1 Janar dhe bashkëpunimi me kompanitë e Marrëveshjeve Hidrokarbure, ka ndikuar në dyfishimin e pagesave prej tyre për buxhetin e shtetit dhe në ulje të ndjeshme të borxhit ndaj “Albpetrol”. Nga 67.606 ton naftë detyrim, që ato i detyroheshin kompanisë publike në 2013, sot ky borxh arrin në 8.241 Ton naftë, me ulje 59.365 ton.

HermesNews - ©2014

Dërgo me email | Stampo artikullin