09/08/2014 13:31:56

Rendi. PD, shifra për vrasjet

Deputeti i PD-së tha se situata e rendit është rënduar dhe nga rritja e numrit të vjedhjeve në banesa dhe vjedhjeve me armë

TIRANË - Partia Demokratike, përmes deputetit Arben Ristani, deklaroi sot se treguesit e rendit në vend kanë pësuar një përkeqësim tronditës gjatë muajit korrik, duke e bërë pasigurinë të papërballueshme për qytetarët. “Kronika e zezë ka mbushur ekranet, por veç kësaj, statistikat zyrtare tregojnë realitetin e dështimit të madh të Edi Ramës e Saimir Tahirit me rendin dhe sigurinë publike”, u shpreh Ristani. Sipas tij, krahasuar me qershorin e këtij viti, 3 persona më shumë kanë humbur jetën nga vrasjet. Po ashtu, përkeqësim ka shënuar numri i aksidenteve, ku korriku u mbyll me 12 viktima ose 3 më shumë se qershori. Deputeti i PD-së tha se situata e rendit është rënduar dhe nga rritja e numrit të vjedhjeve në banesa dhe vjedhjeve me armë dhe me dhunë. “Ky është bilanci i rendit dhe sigurisë, që përkeqësohet nga muaji në muaj dhe që prek çdo ditë qytetarët e vendit”, tha deputeti demokrat Arben Ristani.

HermesNews - ©2014

Dërgo me email | Stampo artikullin