07/08/2014 08:44:01

ËSHTË QEVERIA QË SHPREHET PËR FULLANIN, JO SOCIALISTËT, JO RAMA

Deklarata/ ''Qeveria, i siguron të gjithë shqiptarët se po e ndjek me shumë vëmendje ecurinë e veprimit të organeve të drejtësisë për zbardhjen e plotë të krimit tronditës në Bankën e Shqipërisë dhe është e vendosur të luajë rolin e vet për çdo nisëm që do të mund të nevojitet''

TIRANË - Këshilli i Ministrave e konsideroi sot një akt të rëndë kriminal grabitjen e parave në Bankën e Shqipërisë, ndërsa kërkoi një ndëshkim shembullor për fajtorët.

Në një deklaratë për shtyp, Këshilli i Ministrave bëri të ditur se, gjatë mbledhjes së ditës së sotme është diskutuar me shqetësim mbi ngjarjen shumë të rëndë të grabitjes së parave në Bankën e Shqipërisë.

"Qeveria, shkruhet në deklaratë, e konsideron këtë akt të rëndë kriminal një sfidë të madhe për drejtësinë në radhë të parë, duke nisur nga Prokuroria që duhet të bëjë një hetim të gjithanshëm, të shpejtë dhe shterues për të ndëshkuar çdo person të përfshirë në krimin tronditës."

"Ky akt, vijon deklarata, është po ashtu një sfidë e madhe për autoritetin dhe sigurinë e Bankës së Shqipërisë, e cila brenda kuadrit të pavarësisë së vet duhet të garantojë përmes rishikimit të gjithanshëm të rregullave e mekanizmave të funksionimit të brendshëm, mospërsëritjen e asgjëje të ngjashme në të ardhmen".

Ky akt, cilësohet gjithashtu si një sfidë e madhe për pushtetet e tjera vendimmarrëse, Kuvendin dhe Qeverinë, që të analizojnë e të konkludojnë në mënyrë konstruktive e në bashkëpunim me institucionet financiare ndërkombëtare, mbi nevojat e masat e duhura ligjore për të garantuar, në respekt të plotë të pavarësisë së Bankës së Shqipërisë, një sistem solid kontrolli e transparence të veprimtarisë së këtij institucioni kyç për mirëfunksionimin e shtetit shqiptar.

Në deklaratën e Këshillit të Ministrave theksohet se viti 2014 shënoi për shqiptarët dhe Shqipërinë suksesin e madh të marrjes së statusit të vendit kandidat për Bashkimin Europian. “Marrja e statusit erdhi pas kaq vitesh si pasojë e drejtpërdrejtë e vullnetit të kësaj qeverie të Aleancës për Shqipërinë Europiane, për të luftuar korrupsionin e krimin, por edhe për të respektuar dhe nxitur forcimin e pavarësisë së institucioneve që njihen nga Kushtetuta e Republikës si të tilla. Banka e Shqipërisë është njëra prej tyre”, vijon deklarata.

"Qeveria, nënvizohet në fund të deklaratës, i siguron të gjithë shqiptarët se po e ndjek me shumë vëmendje ecurinë e veprimit të organeve të drejtësisë për zbardhjen e plotë të krimit tronditës në Bankën e Shqipërisë dhe është e vendosur të luajë rolin e vet për çdo nisëm që do të mund të nevojitet në funksion të një sistemi të padepërtueshëm sigurie në funksionimin e bankës qendrore të shtetit shqiptar."

HermesNews - ©2014

Dërgo me email | Stampo artikullin