05/08/2014 16:57:53

Mangësia e alibisë së Kristianit

nga Doriana Metollari

HermesNews - Si mundet një njeri ndaj të cilit policia bën presion dhe e kërcënon me jetë të arratiset nga burgu, për t'u kuruar në Spanjë ?

Imagjinojeni pak veten. Ju kërcënohet jeta, jeni nën presion dhe ju mendoni se si të arratiseni, jo për shkak se mund të vriteni nga dora e policisë, por sepse doni të kuroni dhëmbët, jashtë ta zëmë.

Qesharake. Justifikim fëmijënor. Cilado ishte alibia e Kristian Lumajt dje për A1 Report, ka qenë e mangët.

Për atë që mund të dimë, i riu që në televizor dukej qartazi se ishte në një gjëndje emocionale më të eksituar se duhet (mbase dhe nën efetin e ndonjë droge. Burimet e policisë thanë sot se ai i përdorte), pra për atë çfarë ne dimë për të, mund të jetë dhe i fshehur në male shqiptare.

Çdo hajdut në botë, mendohet dy herë para se të përdorë dhunën, tre nëse vendos ta përdorë mbi policë, sepse e di se kjo për uniformat përbën një sfidë më shumë në hetime.

Nuk dua të komentoj akuzat për presione dhe kërcënimet e uniformave blu. Nuk e di çfarë batutash mund të jenë shkëmbyer mes tyre, por unë dje pashë një të ri, që kërkoi një lidhje të drejtpërdrejtë për t'u treguar njerëzve se ai do të vuante shumë kur të kthehej, dhe këtu avokati ka bërë punën e vet strategjike, si mburojë për opinionin publik.

A ka aplikuar Kristiani për azil politik në Spanjë (nëse ndodhet atje vertet) ? Mbase, po. Në këtë rast kërcënimet me jetë në shtetin e vet, lehtësojnë proçedurat.

Meqë deklaroi se do të kthehet, kërcënimet siç thotë ai, do t'i shërbejnë në betejën ligjore qoftë dhe si mburojë mediatike. Sot ai nuk është një i burgosur që akuzon policinë se do ta vrasë, por një i ri jo i qëndrueshëm, që u arratis nga burgu për t'u kururar.

Një Zot e di se për çfarë, në Spanjë. Ok, a mund të fillojmë prapë nga e para ? Dikush me historinë e vjetër na mori për budallenj.

HermesNews - ©2014

Dërgo me email | Stampo artikullin