05/08/2014 15:32:52

Tahiri dhe Didi takojnë efektivat e shkodrës

Ministri i bën thirrje qytetarëve të bashkëpunojnë me Policine e Shtetit. Asnjë koment për akuzat e deputetit socialist Tom Doshi. Shtohet efektivi i policisë për garantimin e sigurisë gjatë sezonit turistik

SHKODËR - Siguria dhe operacionet antikanabis sollën sot në metropolin e veriut Ministrin e punëve të brendshme Saimir Tahiri dhe zv. ambasadori i BEsë në Tiranë Clive Rumbold.

"Për të shmangur pritjet e gjata në kufi gjatë sezonit turistik, në pikat doganore janë shtuar jo vetëm efektivi policor, por dhe janë thjeshtuar proçedurat për kalimin e mjeteve", tha ministri Tahiri i cili shoqërohej në këtë vizitë dhe nga Drejtori i përgjithshëm i policisë së shtetit Artan Didi dhe Zv.Ministrja e brendshme Elona Gjebrea.

"Sfidat janë të shumta, veçanërisht në këtë kohë, që është dhe sezoni turistik dhe Policia e Shtetit, 100% e efektivit të saj, është në shërbim të qytetarëve për të përballuar fluksin e turistëve dhe veçanërisht edhe në qarkun e Shkodrës", tha Tahiri.

"Lufta kundër korrupsionit dhe lufta krimit të organizuar janë dy prioritete kryesore në këtë rrugëtim, dhe roli i Policisë në këto dy fusha është absolutisht rol kryesor. Jam shumë i kënaqur të dëgjoj nga Policia këtu në Shkodër se ata po vijojnë të konsolidojnë punën e tyre mbi arritjet e bëra nga Shqipëria në muajt e fundit", tha përfaqeëuesi i BEsë Rumbold.

"Lufta kundër korrupsionit dhe lufta krimit të organizuar janë dy prioritete kryesore dhe roli i Policisë në këto dy fusha është absolutisht rol kryesor. Unë fola gjithashtu për luftë kundër drogës dhe jam shumë i kënaqur të dëgjoj nga Policia këtu në Shkodër se ata po vijojnë të konsolidojnë punën e tyre", tha zv.Ambasadori i BEsë në Tiranë Rumbold.

Intervista/ Ministër, cili do të ishte reagimi juaj në lidhje me akuzat që deputeti Tom Doshi ka bërë kundër jush?

Ministri Tahiri: Nuk kam asnjë koment. Unë jam shumë i vendosur të bëj punë time dhe të vazhdoj në luftën kundër krimit dhe korrupsinit.

Mund të na thoni edhe diçka për aksionet anti-kanabis?

Ministri Tahiri: Policia e Shtetit ka shënuar realisht një gur-themeli në luftën kundër kultivimit të lëndëve narkotike. Eshtë një luftë që nuk mbaron kurrë në fakt, për sa kohë ka njerëz që ende besojnë se kultivimi i lëndëve narkotike mund të jetë një mënyrë jetese. Për ne është një krim dhe mbetet i tillë. Jemi shumë të vendosur që të mos lejojmë parcela të kultivimit të lëndëve narkotike. Pas operacionit në Lazarat unë besoj që kemi arritur t’i bindim të gjithë mbi vullnetin tonë për të luftuar këtë fenomen. Në qarkun e Shkodrës kemi arritur rezultate spektakolare në kultivimin e lëndëve narkotike dhe besoj ju keni qenë dëshmitarë të rezultateve të Policisë në këtë fushë.Mbetet një objektiv permanent i Policisë së Shtetit, sepse lufta kundër kultivimit të lëndëve narkotike dhe trafikut ndërkombëtar të lëndëve narkotike, nuk mbaron brenda ditës. Bashkë me partnerët ndërkombëtarë kemi ndërtuar platformat e bashkëpunimit në mënyrë të atillë që lufta kundër drogës të mos konceptohet shoqërisht, të paktën brenda vendit, si luftë ekskluzive e Policisë së Shtetit, përkundrazi, është krim ndërkufitar dhe meriton vëmendjen tonë dhe të partnerëve tanë ndërkombëtarë. Gjë që sot është në nivele maksimale dhe rezultate duken.

Ka pasur një denoncim nga ana e kryetarit të komunës Kastrat dhe në fakt është në rritje shqetësimi sa u përket rasteve të vjedhjeve apo situatave të tjera kriminale në qarkun e Shkodrës. A do të ketë një përforcim të strukturave të Policisë në këtë drejtim, sepse ka shumë ngjarje të cilat mbesin pa autorë ?

Ministri Tahiri: Policia e Shtetit, veçanërisht në këtë kohë, 100% e efektivit të Policisë së Shtetit është në detyrë, jo vetëm për shkak të masave për sezonin turistik, por edhe për të parandaluar vepra penale, të cilat historia ka treguar në këtë kohë janë më intensive. Gjithsesi konsideroni që Policia e Shtetit nuk mund dhe nuk duhet të jetë e vetme në luftën kundër krimit.Policia e Shtetit është hallka kryesore natyrisht, por nuk ka në mënyrë ekskluzive monopolin e luftës kundër krimit. Qytetarët në radhë të parë dhe pastaj institucionet në tërësi, duhet të jenë më të parët që bashkëpunojnë me Policinë e Shtetit, për të luftuar krimin. Duhet të jemi të gjithë të vetëdijshëm që luftë kundër krimit është sipërmarrje kolektive, sipërmarrje e të gjithë institucioneve, sipërmarrje e të gjithë qytetarëve. Vetëm kështu mund t’u dalim përballë atyre pak njerëzve që ende e çojnë nëpër mend se mund të shkelin ligjin.

Ministër, si po i përgjigjeni fluksit në rritje të turistëve në pikat e kalimit në Morinë, Muriqan etj ?

E shpjegova dhe më parë. Jo vetëm është 100% e efektivit të Policisë së Shtetit në detyrë, por kemi thjeshtuar në maksimum procedurat për turistët që vijnë në Republikën e Shqipërisë, duke konsideruar që më e rëndësishme është që të garantojmë kufij të hapur por të sigurt për turistët që duan të shpenzojnë pushimet në Shqipëri.

Doriana Metollari

Dërgo me email | Stampo artikullin