04/08/2014 11:30:29

Protesta para Bankës së Shqipërisë. Të dorëhiqet guvernatori i bankës

Qytetarët kërkojnë dorëheqjen e guvernatorit Ardian Fullani. Politika e ndarë, Meta dhe Berisha distancohen nga dorëheqja. Edi Rama dhe Lulzim Basha heshtin. Erion Braçe, ''duhej të kishte dhënë dorëheqjen me kohë''. Prokuroria fillon hetimet, të nëntët sot merren në pyetje. Paratë nuk shkuan të gjitha në lloto

TIRANE - Inspektoriati i pasurive ka filluar hetimin për pasurinë e familjes Fullani. Të gjitha pasuritë e guvernatorit të bankës së shqipërisë Ardian Fullani do të hetohen, së bashku me të dhe pasuritë e familjareve, zv.guvernatorit të bankës dhe drejtuesve të tjerë të saj, duke filluar nga viti 2003.

Sipas inspektoriatit të pasurive, kryeinspektori Shkelqim Ganaj ka ngritur një grup hetimor për vjedhjen e 713 milionë lekë nga punonjësit e thesarit të bankës. Rrezultatet e hetimeve do t'i dërgohen prokurorisë së përgjithshme për ndjekje të metejshme. Inspektoriati ka kërkuar të mbledhë informacione të tjera në lidhje me pasuritë marramendëse të guvernatorit dhe shpenzimet e familjarëve (e bija e guvernatorit Fiona, paguan 2500 Euro për një shtëpi të marrë me qera në qëndër të Milanos, komenton një lexues i hermesnews në facebook), duke ruajtur sekretin mbi identitetin e atyre që kanë dijeni për prova.

Siç mund të imagjinohej lehtësisht, jo të gjitha paratë e vjedhura janë shpenzuar në lojëra fati. Prokuroria ka deklaruar se shumat e parave të shpenzuara në lloto, siç tha Ardian Bitraj, nuk janë të gjitha atje, prandaj në Shqipëri filluar gjuetia për gjetjen e thesarit që iu vodh shqiptarëve.

Sot merren në pyetje e nëntë të arrestuar, ndër ta, Ardian Bitraj përgjegjës i thesarit, Mimoza Bruzia specialiste e arkës, Petrit Rahomitaj, përgjegjes i arkës, Liljana Tusha specialiste e arkës, Lavdim Cani specialist i arkës, Myzejen Belba specialiste e arkës, Bashkim Xhilaja përgjegjës i dy arkave, Dhimiter Davidi vëzhgues dhe Klevis Bejtaj nipi i Ardian Bitrajt.

Para dyerve të bankës së shqipërisë është parashikuar një protestë për të kërkuar dorëheqjen e guvernatorit të bankës së shqipërisë.

Kryetari i komisionit të ekonomisë Erion Braçe tha se Fullani duhej të kishte dhënë dorëheqjen para 5 viteve. Avokat Spartak Ngjela po ashtu ka kërkuar dorëheqjen e guvernatorit. Sali Berisha dhe Ilir Meta nga ana tjetër kanë thënë se vjedhja u denoncua nga drejtuesit e bankës, duke u pozicionuar në anën e kundërt të atyre që kërkojnë hetime dhe dorëheqjen e guvernatorit.

HermesNews - ©2014

Dërgo me email | Stampo artikullin