01/08/2014 11:02:14

Orët e guvernatorit

nga Doriana Metollari

HermesNews - Ka rënë heshtje. Në çdo skandal që prek bankat, qoftë dhe vrasje ka vetëm heshtje dhe ndonjë deklaratë aty këtu sa për t'u thënë njerëzve që po, jemi me ju. Çdo informacion që është dhënë për skandalin e vjedhjes së milionave në Bankën e Shqipërisë, është shumë sipërfaqësor dhe më shumë se hetim të mirëfilltë në media po përgojohet.

Dikush duhet të informojë për ecurinë e këtyre hetimeve. Pse nuk ka një konferencë për shtyp që t'i përgjigjet interesit të mediave ? Për cilin sekret hetimor po flasim ? Mosdhënia e informacionit është një, mbulimi i informacionit diçka tjetër. A po ndodhin tratativa ndërkohë që ne po presim dhe nuk duhet të dimë ?


Sekreti hetimor, kam përshtypjen se po përdoret më shumë se po respektohet.

Guvernatori Fullani publikoi një deklaratë për denonimin e vjedhjes me datë 23 Korrik dhe një e përditshme shqiptare, publikoi arrestimin e gjashtë personave që punonin në bankë dhe shpalljen në kërkim të të shtatit.

E quajnë Fullanin si një dekonspirues që prishi marëveshje me hetuesit për nxjerrjen e sekretit hetimor, unë preferoj ta quaj një person që për herë të parë ndoshta në jetën e tij, ka hedhur një, dy, apo tre karta mbi tavolinë.

Kreu i LSIsë Ilir Meta dje tha se Fullani ka qenë i pari që e ka denoncuar vjedhjen duke u bërë një ndër të parët politikanë që mbajtën një pozicion ndaj tij. As Lulzim Basha nuk e ka bërë, as Edi Rama nuk e ka bërë.

Unë nuk do të kërkoja një qëndrim të tyre tani: unë do të kërkoja një konferencë për shtyp nga ana e prokurorisë, meqë heshtja jo gjithmonë është "sekret hetimor" është dhe mbulim.

HermesNews - ©2014

Dërgo me email | Stampo artikullin