26/07/2014 06:40:56

Marëveshje tre vjeçare bashkëpunimi

Një pikë e rëndësishme e bisedës preku përpjekjet e Shqipërisë dhe angazhimin personal të Kryeministrit Edi Rama për të thelluar bashkëpunimin

TIRANË - “Shqipëria përfaqëson një shtyllë të fortë të stabilitetit rajonal”, deklaroi Kryediplomatja italiane, Federica Mogherini në takimin e zhvilluar me Kryeparlamentarin Ilir Meta, në kuadër të vizitës së saj zyrtare në vendin tonë.

Gjatë këtij takimi, Meta vlerësoi partneritetin e shkëlqyer strategjik midis dy vendeve dhe shprehu besimin se Italia do të bëjë përpjekjet maksimale për të mbështetur një lidhje më të fortë të Shqipërisë dhe rajonit me Bashkimin Europian gjatë presidencës italiane.

Meta dhe znj. Mogherini vlerësuan rëndësinë e forcimit të marrëdhënieve ndërparlamentare midis dy vendeve.

Gjatë kësaj vizite, Ministrja e Jashtme e Italisë u prit edhe nga Zv.kryeministri Niko Peleshi, i cili i shprehu falenderimet e Qeverisë Shqiptare për mbështetjen e vazhdueshme që Italia i ka dhënë Shqipërisë në të gjitha fushat, por veçanërisht në procesin e integrimit europian dhe për lobimin në favor të marrjes së statusit të vendit kandidat nga Shqipëria. Në këtë kontekst, ai u shpreh se Presidenca Italiane e BE është një mundësi më shumë për afrimin e mëtejshëm të Shqipërisë me BE dhe fokusimin e politikave të BE ndaj Shqipërisë dhe rajonit.

Një pikë e rëndësishme e bisedës preku përpjekjet e Shqipërisë dhe angazhimin personal të Kryeministrit Edi Rama për të thelluar bashkëpunimin me vendet fqinje përmes projekteve të përbashkëta të investimit dhe bashkëpunimit në funksion të integrimit ekonomik të rajonit.

Zëvendëskryeministri e njohu zonjën Mogherini po ashtu edhe me punën e bërë në këto 300 ditë nga qeveria dhe me reformat e rëndësishme që po ndërmerren veçanërisht në fushën e sundimit të ligjit dhe përmirësimit të klimës për bizneset dhe investitorët e huaj.

Duke vlerësuar reformat dhe arritjet e qeverisë shqiptare, Ministrja Mogherini shprehu gatishmërinë e Qeverisë Italiane për të thelluar bashkëpunimin ne të gjitha fushat si dhe për të intensifikuar edhe më tej marrëdhëniet ekonomike mes dy vendeve.

Në takimin me Presidentin Bujar Nishani, Ministrja e Punëve të Jashtme Mogherini, u shpreh se integrimi i Shqipërisë dhe i Ballkanit Perëndimor është një prioritet i Presidencës Italiane dhe duhet të jetë prioritet për të gjitha Presidencat dhe për Bashkimin Evropian në vijimësi.

Ndërsa Presidenti Nishani, duke folur për zhvillimet rajonale, vuri në dukje se Shqipëria do të vazhdojë të luajë rolin e saj konstruktiv në mbështetje të paqes dhe stabilitetit në rajon dhe kërkoi që Italia, në kuadër të politikës së saj aktive në Ballkanin Perëndimor, të bëhet pjesë e Procesit të Brdo-Brijunit, një nismë, fryma e së cilës është zbatimi i projekteve rajonale të zhvillimit me mbështetjen e Bashkimit Evropian.

HermesNews - ©2014

Dërgo me email | Stampo artikullin