19/07/2014 17:40:36

Gati shkolla për 500 djem e vajza në polici

Polici dhe standarte. Premtime dhe iniciativa të reja. Përurohet shkolla bazë e policisë

TRANE - 500 studentët e parë te grupit nisën sot shkollën bazë të policisë së shtetit. Studentët u përzgjodhën për të vazhduar trajnimin policor. Në mesazhin e tij, Ministri i Brendshëm Saimir Tahiri tha se vetëm besimi tek vetja, tek përgatitja, përkushtimi, profesionalizmi garantojnë karrierë të suksesshme në Polici.

"Kemi parashikuar ndarjen definitive të policisë nga politika. Por mbi të gjitha, kuptoni që i keni hyrë rrugës për t’i shërbyer qytetarëve. Jo për t’u sjellë më të fortë se ligji, as më të butë sesa ligji. Por për t’u sjellë si zëdhënës të ligjit", tha Ministri i Brendshëm.

Në ceremoni ishte i pranishëm dhe kryeministri Rama i cili premtoi sigurinë teknike të logjistikës së policisë. "Raportet e bëra nga të tjerë, tregojnë se gjendja e automjeteve në 70% të rasteve është jashtëzakonisht e vështirë dhe se 52% e automjeteve në përgjithësi janë jashtë çdo standardi për transport policor."

Është në projekt ulja e moshës së daljes në pension për policinë e shtetit, "do të kemi Polici Shteti më të re, edhe pse ende jo aty ku duhet të jetë, por viti i parë, hapi i parë," premtoi Rama. "Po rrisim mesataren e të arsimuarve në Policinë e Shtetit".

Në fund, dy fjalë dhe për barazinë gjinore në këtë përzgjedhje. "Për shumëkënd mund të jetë dukur në fillim si diçka pa kuptim vënia e theksit tek ky aspekt, por rezultatet e arritura nga ai numër i vogël policesh vajza, që janë përfshirë në punën për qarkullimin më të mirë në rrugët e kryeqytetit, tregojnë se çfarë vlere të shtuar mund të sjellin punonjëset e policisë, krah për krah me djemtë", përfundon kreu i qeverisë.

HermesNews - ©2014

Dërgo me email | Stampo artikullin