18/07/2014 16:20:15

HARTA: Ja bashkitë e reja

Qeveria propozoi hartën me 47 bashki, por pas propozimeve të të zgjedhurve vendorë dhe PDIU-së komisioni vendosi të shtojë dhe 14 bashki, nga Veriu në Jug të vendit, duke sjellë draftin përfundimtar me 61 bashki

TIRANË - Harta e re territoriale e Shqipërisë është miratuar në parim dhe do të ketë 61 bashki. Ajo do t’i kalojë për mendim Këshillit të Ministrave dhe më tej për miratimin përfundimtar me ligj Kuvendit të Shqipërisënë seancën e 31 korrikut. Qeveria propozoi hartën me 47 bashki, por pas propozimeve të të zgjedhurve vendorë dhe PDIU-së komisioni vendosi të shtojë dhe 14 bashki, nga Veriu në Jug të vendit, duke sjellë draftin përfundimtar me 61 bashki.
Në ndarjen e re territoriale u pranua varianti i PDIU-së për të përfshirë bashkinë e Konispolit, mes bashkive të reja, e cila popullohet kryesisht nga shqiptarë me origjinë çame. Në variantin paraprak Konispoli ishte pjesë e Bashkisë së Sarandës. Në mbledhjen e djeshme, kryetari i komisionit të posaçëm, Bashkim Fino, tha se kërkesa e opozitës për ta nisur nga decentralizimi është e parealizueshme dhe se kjo reformë do të ndodhë me nisjen e sesionit të ri parlamentar në shtator.

Miratimi i hartës së re territoriale në fund të korrikut do të thotë se vitin e ardhshëm zgjedhjet do të organizohen sipas hartës me 61 bashki. Bashkite e reja që iu shtuan variantit me 47 njësi vendore janë si më poshtë:

1. Bashkia Fushë – Arrëz
2. Bashkia Klos
3. Bashkia Vorë
4. Bashkia Rrogozhinë
5. Bashkia Belsh.
6. Bashkia Prrenjas
7. Bashkia Roskovec
8. Bashkia Ura Vajgurore
9. Bashkia Poliçan
10. Bashkia Selenicë
11. Bashkia Konispol
12. Bashkia Memaliaj
13. Bashkia Këlcyrë
14. Bashkia Libohovë

HermesNews - ©2014

Dërgo me email | Stampo artikullin