17/07/2014 15:36:10

Emiratet e Bashkuara Arabe planifikojnë një mision në Mars në 2021-in

Kemi qenë gjithnjë një rajon i civilizuar qysh nga zanafilla e njerëzimit. Fati ynë është të eksplorojmë, të krijojmë, të ndërtojmë e të civilizojmë

DUBAI - Emiratet e Bashkuara Arabe planifikojnë të kryejnë një mision në planetin Mars brenda vitit 2021. Vendet e pasura të naftës pasi arritën të ndërtonin grataçelin më të madh në botë, synojnë tjetër rekord, këtë herë drejt yjeve. Misionet në Mars janë ende tepër të vështira dhe komplekse për veteranët e udhëtimeve hapësinore si Rusia, por vendet arabe tashmë kanë investuar rreth 20 bilion dirham përsa u përket teknollogjive hapësinore me qëllimin për të arritur planetin e kuq që prej kohësh ngacmon kureshtjen e shkencëtarëve në mbarë botën.

Monarku i Dubait, një nga shtatë emiratet që përbëjnë lidhjen arabe, është shprehur se falë këtij misioni bota arabe do të tregojë se përtej të gjitha konflikteve që prej kohësh karakterizojnë ato anë, arabët janë në gjendje të kontribuojnë për progresin shkencor të njerëzimit.

“Kemi qenë gjithnjë një rajon i civilizuar qysh nga zanafilla e njerëzimit. Fati ynë është të eksplorojmë, të krijojmë, të ndërtojmë e të civilizojmë”- u shpreh Sheik Mohammed bin Rashid Al Maktoum.

Gjer tani vetëm Amerika ka pasur një sukses modest në udhëtimet hapësinore në Mars, por vendet arabe duken të vendosura të bëjnë hapa të mëdha në këtë fushë. Pritet bashkëpunimi në këtë projekt i të tjera vendeve arabe të pasura, ndër të cilët edhe Irani.

Daniela Vathi

Dërgo me email | Stampo artikullin