11/07/2014 19:07:45

Pezullohen deputetët e dhunshëm

Deputeti Arben Ndoka pezullohet 7 ditë, deputetit Pjerin Ndreu 3 ditë, ndërsa për deputetin Gent Strazimiri u mor masa vërejtje për herë të dytë. Regojnë demokratët, ''e turpshme''

TIRANE - Byroja e Kuvendit u mblodh me kërkesë të Kryetarit të Kuvendit, Ilir Meta për të diskutuar incidentin e ndodhur gjatë seancës plenare të ditës së enjte, në ambjentet e jashtme të sallës, ku u përfshinë deputetët Arben Ndoka, Gent Strazimiri dhe Pjerin Ndreu.

Përfaqësuesit e opozitës nuk morën pjesë në këtë mbledhje. Duke u bazuar edhe në rregullore, Byroja vendos të marrë masë disiplinore ndaj deputetëve të përfshirë në këtë incident. Kështu, deputeti Arben Ndoka është pezulluar për 7 ditë nga punimet e Kuvendit, deputetit Pjerin Ndreu 3 ditë, ndërsa për deputetin Gent Strazimiri u mor masa vërejtje për herë të dytë.

Meta ftoi të gjithë deputetët që të distancohen nga akte të tilla duke kërkuar vetëpërmbajtje dhe të ruajnë etikën në ushtrimin e funksionit të tyre. Meta, kërkoi nga grupet parlamentare të shprehen sa më parë në lidhje me Projektkodin e etikës i cili është hartuar nga shërbimet e Kuvendit në bashkëpunim me OSBE.

Demokratet kane reaguar menjehere pas ketij vendimi: "Dyshja Rama-Meta lanë duart sot me një vendim të turpshëm të byrosë së Kuvendit, duke vendosur masë disiplinorë për deputetin Strazimiri dhe për agresorët e tij, Ndoka dhe Ndreu. Kjo është një përpjekje e turpshme për të barazuar aktin e denoncimit që bën në Kuvend deputeti demokrat, me aktin banditesk të dy deputetëve Ndoka e Ndreu, të cilët goditën me grushte Strazimirin", shkruhet në komunikaten për shtyp.

HermesNews - ©2014

Dërgo me email | Stampo artikullin