11/07/2014 18:28:47

KuqeZinjtë protestojnë për shkupin

Protestuesit mbanin vetëm flamurë KuqeZi dhe simbole kombëtare duke mos lejuar asnjë flamur partiak apo simbole të huaja

TIRANE - Aktivistë të Aleancës KuqeZi dhe të përndjekurit politik u tubuan sot në Tiranë në të njëjtën orë me protestuesit e Shkupit. Protestuesit mbanin vetëm flamurë KuqeZi dhe simbole kombëtare duke mos lejuar asnjë flamur partiak apo simbole të huaja. Me thirrje patriotike protestuesit përshkruan një nga akset kryesore në kryeqytet dhe rrethuan ambasadën e Republikës së Maqedonisë. Kreshnik Spahiu dhe aktivistët rrethuan selinë e ambasadës Maqedonase. "Marrëveshja për të vendosur rendin publik dhe kushtetues në Maqedoni me ndihmën e policisë serbe është një formë diktati për të mbajtur shqiptarët të pushtuar nën regjimin mostër serbo-maqedonas", tha Spahiu. Aleanca KuqeZi ftoi të gjithë faktorin politik shqiptar, "që të nënshkruajë një pakt kombëtar historik me gjithë liderët e Tiranës, Shkupit, Ulqinit, Preshevës dhe Prishtinës për mbrojtjen e të drejtave të shqiptarëve, pengimin e asimilimit të qyteteve etnike dhe historike shqiptare si dhe vendosjen e garancive paqësore, politike dhe diplomatike për stabilitetin, bashkimin dhe integrimin e shqiptarëve në rajon dhe Europë", shkruhet në komunikatën për shtyp.

HermesNews - ©2014

Dërgo me email | Stampo artikullin