08/07/2014 14:28:44

Gjobat që do të falen

Me këtë projekt-vendim, pritet të vihet në vend ligjshmëria e cënuar nga veprimet abuzive të administratës fiskale

TIRANE - Një projekt-vendim i hartuar nga ministria e Zhvillimit Ekonomik, Tregtisë dhe Sipërmarrjes parashikon faljen e gjobave, që j’u vunë një numri të konsiderueshëm biznesesh nga organet tatimore dhe doganore për periudhën 1 mars deri në 31 gusht të vitit 2013. Prej kësaj mase ligjore, një numër i konsiderueshëm biznesesh do të çlirohen nga detyrimi për t’i paguar ato. Burime zyrtare të ministrisë thanë se, “me këtë projekt-vendim, pritet të vihet në vend ligjshmëria e cënuar nga veprimet abuzive të administratës fiskale ndaj biznesit si presion në kohën e fushatës zgjedhore të 2013-tës. Projekt-vendimi është iniciuar dhe firmosur nga ministri i Zhvillimit Ekonomik, Arben Ahmetaj dhe pritet të miratohet javën që vjen në Qeveri, thanë burimet e ministrisë. Falja e gjobave të vendosura vjet në fushatën zgjedhore, u paralajmërua gjatë fushatës elektorale nga kreu i opozitës së atëhershme, Edi Rama, sot Kryeministër i Shqipërisë.

HermesNews - ©2014

Dërgo me email | Stampo artikullin