08/07/2014 14:03:24

Ministria e Brendshme; Po, aksidentoi ish gardisti

Akuzat e PDsë për fshehjen e aksidentit ku vdiq 19 vjeçari. Ministria e brendshme reagon, ish gardisti nuk ishte në funksione publike dhe aktualisht është arrestuar

(17:25) Reagimi i Ministrisë së Brendshme pas denoncimit të Partisë Demokratike, për fshehjen e krimit, konfirmoi edhe një herë përpjekjen që është bërë për të mbuluar lajmin e aksidentimit për vdekje të 19 vjeçarit nga eskorta e Ilir Metës. Reagimi i Ministrisë së Brendshme nuk i jep asnjë përgjigje shqetësimit tashmë mbarëpublik për mosraportimin e ngjarjes së rëndë.

Së pari, përse Ministria e Brendshme nuk e ka raportuar ngjarjen kur ajo ka ndodhur, dhe e bën të ditur vetëm pas denoncimit të Partisë Demokratike?

Së dyti, si shpjegohet që shefi i eskortës së Kryetarit të Kuvendit paska qënë duke qarkulluar privatisht në një segment që të çon e të sjell nga Gjiri i Lalëzit, një itinerar i bërë shpesh nga z.Meta ?

Së treti, si shpjegohet që shefi i eskortës së Kryetarit të Kuvendit ka qënë duke lëvizur privatisht ditën kur z.Meta ka qënë në plazhin e Lalëzit dhe është parë gjatë gjithë kohës atje nga dëshmitarë okularë?

Ngjarja e dy netëve më parë dhe fshehja e lajmit janë sjellje kriminale.
Reagimi i sotëm i Ministrisë së Brendshme synon sërish fshehjen e ngjarjes.
Ky reagim është gjithashtu kriminal. //komunikata e PD//

(17:19) Deklarata e PD-së për fshehjen e një aksidenti është tërësisht e pavërtetë. Në komunikatën e përditshme të Policisë së Qarkut Durrës, njofton se është arrestuar shtetasi K. B., pasi ka aksidentuar me pasojë vdekjen këmbësorin M.L., 19 vjeç, banues në Maminas. Prokurori pranë Prokurorisë së Rrethit Gjyqësor Durrës, Ilir Turja, ka drejtuar dhe ndjekur gjithë veprimet procedurale, që nga momenti kur është marrë njoftimi për ndodhjen e aksidentit. MPB-ja sqaron se shtetasi K. B, oficer pranë Gardës së Republikës, në momentin e ngjarjes nuk ka qenë me shërbim. Shtetasi K.B. ishte duke udhëtuar me automjetin e tij personal me targa AA 027 JP dhe nuk ka qenë në ushtrim të funksioneve të tij. Me marrjen e njoftimit për arrestimin në flagrancë për veprën penale të “Shkeljes së rregullave të qarkullimit rrugor” neni 290 pika 2 i Kodit Penal, shtetasi K. B. është pezulluar nga detyra si oficer i Gardës së Republikës, deri në sqarimin e rrethanave të ngjarjes”, bën me dije Ministria e Brendshme. //Komunikata e Ministrise se Brendshme//


(15:48) Më datë 07.07.2014, ora 04.00, u bë arrestimi në flagrancë i shtetasit Kastriot Braho, 43 vjec, banues në Tiranë, pasi më datë 06.07.2014, rreth orës 21.45, në aksin rrugor Maminas-Manëz, në vendin e quajtur Bilalas, duke drejtuar mjetin Benz me targa AA 067 JP ka aksidentuar me pasojë vdekje këmbësorin M.L., 19 vjec, banues në Maminas. Materialet iu kaluan Prokurorisë Durrës për veprën penale të ”Shkeljes se rregullave të qarkullimit rrugor”. //komunikata//


TIRANE - Partia demokratike ka denoncuar sot "një ngjarje të rëndë", ndodhur dy netë më parë rreth orës 22.00 në fshatin Bilal të Bashkisë Manëz. Ne komunikate shkruhej se, "eskorta e Kryetarit të Kuvendit, Ilir Meta, ka përplasur për vdekje Marsel Lohjan, 19 vjeç, të cilit iu dha dje pasdite lamtumira e fundit. Ky aksident vdekjeprurës, u kthye menjëherë në një ngjarje të rëndë kriminale, pasi për 48 orë, Ilir Meta arriti ta fshehë ngjarjen, duke u përpjekur të mbyllë punët me policinë, prokurorinë dhe familjen e viktimës." PD i kërkon policisë të bëjë transparencë dhe prokurorisë të hetojë rrethanat e ngjarjes.

komunikatë për shtyp

Dërgo me email | Stampo artikullin