02/07/2014 17:54:29

Një ditë në ''lazaratin'' e veriut. Kur kamerat u fikën

nga Doriana Metollari

SHKODËR - Zëdhënësi i shtypit na kishte lajmëruar vetëm një natë para, se të nesërmen do të organizohej një operacion antidrogë në fshatin Vjerdhë. Duhej të takoheshim shumë herët në ujërat e liqenit të Vaut të Dejës ku kishin dalë rreth 50 policë. Në breg ndodheshin dy gomone me të cilat parashikova se do na duhej të kalonim liqenin.

Po të ishim atje për tjetër mision, do të ndaleshim për të parë malet që rrethonin ujërat e kthjellëta të liqenit me rrezet e diellit që preknin butësisht ujin. Kjo ndjesi e paqtë e natyrës thyhej nga shkrepja e flasheve me reporterë që hera - herës ngriheshin në këmbë sipër gomones për të filmuar panoramën. Zona ishte e survejuar shumë mirë nga uniformat. Nuk i kishin lënë asgjë rastësisë. E dinim se nuk kishte rrugë për në mal, por një shteg që ne e hapnin për t'i bërë rrugë njeri - tjetrit. Një shteg i egër, i mbuluar thuajse terësisht nga ferrat dhe degët e pemëve të egra. Policia e kalonte shumë lehtë. Në krahasim me vendet ku kishin qenë të detyruar të kalonin barkazi në tokë, kjo e sotmja ishte pak a shumë një "shëtitje". Na porositën se mund të kishte gjarpërinj. Ishin problem i atyre shtigjeve të humbura malesh që kultivuesit i zgjidhnin po për të njëjtën arsye.

Misioni italian i interforcës kishte monitoruar zonat me kanabis duke bërë gati hartat që përshkruanin me shumë detaje zonat e mbjella me kanabis. "Më parë e kishim problem t’i gjenim, nuk dalloheshin mirë nga hartat. Këto që kanë sjellë italianët, janë shumë të detajuara", më tha një polic afër meje.

Mësova se operacionet bëheshin më të rrezikshme kur bima arrinte fazën e vet të pjekurisë. Korrja bëhej rreth periudhës së gushtit. "Janë gati ta mbrojnë me kallashnikov bimën kur piqet. Ju ikën gjithë ai investim", vijoi ai.

Kanabisi mund të ngatërrohej lehtësisht me kërpin. Për të inkriminuar dikë për trafik, apo kultivim kanabisi, laboratorët masin përqindjen e nivelit të THC-së së bimës. Nëse bima është në fazën fillestare nuk inkriminon kënd. Pjekuria e bimës dallohej atëherë kur asaj fillonin t'i dilnin bohçet. Ishte koha për t'u korrur. Sipërfaqja që gjetëm ne ishte rreth 900 m katror. Për rritjen e kanabisit ka rëndësi ujitja, (që bëhej me zorra; një prej të cilave e gjetëm poshtë malit kur zbritëm), dhe jo terreni. Është një bimë shumë e thjeshtë për t’u kultivuar, rritet deri në 2 metra lartësi. Kur piqet bëhet hashash dhe transportohet nga mali drejt jugut, ose në kufi me veriun për t’a nxjerrë jashtë (foto).

Dy - tre kilogramë farë bime kushtonin rreth €100. Nga kanabisi nxirret dhe vaj, i cili në treg kushtonte deri në €2000 një Litër, ndërsa bima shitet rreth €200 një kilogramë. Vlera e tregut është diku rreth €10 për 10 gramë.

Shkencëtarët kanë krijuar dhe kanabis të modifikuar gjenetikisht, i cili vjen nga Hollanda, së bashku me farat e tjera të luleve. Eshtë më lehtë të sjellësh farat e bimevë se bimët.

Pas Lazaratit të vërtetë, zonat më të kultivuara janë ato të veriut, Malësia e Madhe, Dugagjini, por dhe zonat pas Dajtit të Tiranës dhe Krujës, me një fjalë e gjithë Shqipëria.

Duke shkulur rrënjët e kanabisit policët tregonin hera - herës histori. "Kur po kaloja barkazi nëpër ferra, njëherë më kaloi para syve një gjarpër. Shef mos luaj, më tha shoku në krah", tregonte një oficer i ri policie që i vuri zjarrin një dëngu me kanabis të grumbulluar.

Bima e njomë, e patharë, në fazat e saj fillestare dhe ka në aromë që deri diku i ngjason mentes, por më pak delikate se mentja. Ngjyra e gjetheve është e fortë.

Çdo zonë ka maksimumi dy inspektorë. Asgjësimi i kanabisit nuk është varur kurrë nga mungesa e informacionit për kultivimin e tij, por nga mbrojtja që i është bërë kultivuesve, nëpërmjet telefonatave që u vinin policëve në celularë sapo individualizohej një sipërfaqe e kultivuar më kanabis.

"Eh kur fillonin telefonatat, mbyllej loja", tregonin ata. Disa preferonin dhe të mbyllnin sytë për një dorë të mirë parash madje dhe veshët, sidomos me një rrogë të vogël dhe një familjë pas shpine për t'a ushqyer. Tek e fundit inspektorët vazhdimisht ishin në konflikt me banorët që më pas nuk nguronin ta bënin dhe personale çështjen e kanabisit.

"Operacionet vijojnë çdo ditë", më tha drejtori i policisë së shkodrës Shaban Nexhi. Mesa dukej parashikohej një verë jo e zakonshme, përfshi mungesën e pushimeve.

Atë ditë policia preu dhe asgjësoi rreth 2000 rrënjë kanabis, por aty - këtu ndonjë rrënjë ishte vënë mënjanë, jo nga policia, nga kolegët e mi, që i kishin ruajtur dhe i morën me vete. Nuk arrita t’u besoja syve kur i pashë, por preferova të mos e shkëpus bisedën me një polic që po priste bimët e fundit ende në këmbë.

"U desh të binte Lazarati", tha ai, "nuk kemi kundërshtime me armë si më përpara", dhe vazhdonte të shkulte nga toka bimët, ndërsa djersë i rrëshqisnin nga balli me rrudha drejt faqeve të skuqura nga dielli, "tani... tani nuk kemi më frikë vajzë".

Mbylla bllokun që mbajta në dorë deri atëherë. Kishte thënë shumë.

HermesNews - ©2014

Dërgo me email | Stampo artikullin