02/07/2014 12:34:08

Policia do të qëllojë: rregullat e reja

Ligji i ri për përdorimin e armëve; kur do të qëllojë policia dhe ku do të përdoret arma. Kriteret e reja. Arma nuk do të përdoret më për shpërndarjen e protestave

TIRANË - Dy projektligje të reja, për përdorimin e armëve të zjarrit dhe për armët, u prezantuan në komisionin e ligjeve nga Ministri i Brendshëm Saimir Tahiri.

Policia e Shtetit ka të drejtë të qëllojë për të mbrojtur shtetas apo vetveten dhe do të ketë armë, "të pakrahasueshme me të tjerët", tha ministri shqiptar.

Projektligjet rregullojnë përdorimn e subjekteve që kanë të drejtë të mbajnë armë. Kriteret që deri dje rregulloheshin mbi bazën e figurave të krimit, me ligjin e ri përcaktoret si kriter, "objektivi i shkallës së rrezikshmërisë", dhe "kundërveprimit me armë ndaj forcave të policisë", tha Tahiri në komisionin e ligjeve.

Arma do të përdoret si mjet i fundit dhe vetëm atëherë kur rrezikohet jeta e shtetasve apo e policit, i cili mban përgjegjësi personale për veprimin, përjashto, "rastet kur bëhet fjalë për aksion policor", tha Tahiri.

Një tjetër risi e ligjit të ri është përdorimi i armëve ndaj grave, të miturve dhe të moshuar, përsa kohë që këto kategori paraqesin rrezik eminent për jetën e policisë apo shtetasve.

Armët nuk do të përdoren më për shpërndarjen e protestave, apo si paralajmërim për shpërndarjen e protestuesve.

Tahiri tha se nuk do të ketë pajisje me armë për shkak të detyrës (deputet, gjyqtar, kryetar komune dhe bashkie), nuk mund të pajisen me armë personat që kanë shkelur ligjin në të kaluarën, nuk ka paguar taksat dhe detyrimet fiskale ndaj shtetit, ka në rrethin e ngushtë familjar persona me precedent penal, është evidentuar nga policia si person që ka kundeshtuar forcat e rendit apo janë proceduar për gjakmarrje, hakmarrje e dhunë në famlije (ose mbi të cilët rëndon dyshimi i arsyeshëm se janë të përfshirë në këto vepra penale).

Nuk mund të pajisen me armë ata, që nuk provojnë shëndet të plotë mendor dhe fizik. Deri dje pajisej me armë kushdo, pa asnjë detyrim për të mësuar armën, me ligjin e ri, ka nevojë për dëshmi aftësie, pas një kursi dhe provimi përkatës dhe çertifikimeve mujore. Hiqet përfundimisht nga qarkullimi kallashnikovi dhe pistoleta TT. Këto janë armë luftarake dhe si të tilla nuk mund të përdoren nga askush. Armët do vulosen me markën AL.

HermesNews - ©2014

Dërgo me email | Stampo artikullin