01/07/2014 18:01:06

Opozita dorezon propozimet per reformen

Partia Demokratike do të paraqesë propozimin e tyre si duhet kryer një nga reformat më të rëndësishme për vendin

TIRANË - Opozita pritet që të dorëzojë propozimet e saj në lidhje me reformën administrative-territoriale, pikërisht një muaj para mbylljes së afatit për ngritjen e komisionit të posaçëm parlamentar.

Partia Demokratike, bashkë me shoqatat e të zgjedhurve vendorë, do të paraqesin propozimin e tyre se si duhet kryer një nga reformat më të rëndësishme për vendin.

Deputetja Jorida Tabaku, tha për Top Channel, se thelbi i kësaj reforme nuk është harta, por decentralizimi, një koncept ky i kundërt me rrugën e ndjekur prej qeverisë.

“Reforma territoriale duhet të jetë një reformë e cila nis me decentralizimin, vazhdon me ndryshimet në paketat e ndryshme ligjore, në ligjin për pushtetin vendor dhe përfundon ka si produkt përfundimtar një hartë, një ndryshim territorial. Pra harta nuk është qëllim në vetvete, por harta si përfundim dhe produkt i një procesi logjik të nisur me këto elementë që unë përmenda”, tha Tabaku.

Në draft-rezolutën që pritet të miratohet nga takimi i fundit, ku janë ftuar të zgjedhurit nga 386 njësi vendore, peshën kryesore për paketën reformuese do ta mbajnë propozimet e ekspertëve, një prej të cilëve flet për një ndarje nga 88 deri në 100 njësi vendore.

HermesNews - ©2014

Dërgo me email | Stampo artikullin