25/06/2014 18:29:28

Vijojnë hetimet për agimin e artë

Pas 10 ditësh ndërprerje të hetimeve, tashmë do të mund të vazhdojnë deponimet e deputetëve ndaj të cilëve rëndojnë akuzat

ATHINE - Rifillojnë proçedurat e hetimit për çështjen e agimit të artë, pas refuzimit nga Këshilli Gjyqësor të kërkesës për ndërrimin e hetuesve, kërkesë që kishte bërë sekretari i përgjithshëm i partisë së ekstremit të djathtë grek, Nikos Mihaloliakos. Pas 10 ditësh ndërprerje të hetimeve, tashmë do të mund të vazhdojnë deponimet e deputetëve ndaj të cilëve rëndojnë akuzat. Sipas të gjitha gjasave, do të deponojnë bashkëshortja e Mihaloliakosit, deputetja Eleni Zaruli, e cila akuzohet për pjesëmarrje dhe drejtim të organizatës kriminale si dhe deputeti tjetër, gjithashtu i akuzuar, Kostas Barbarusis. Para pak ditëve, edhe deputetit tjetër të ”Agimit të Artë”, Nikos Kuzilos i është komunikuar masa e paraburgimit, pas daljes para hetuesve për akuzën e pjesëmarrjes dhe drejtimin e organizatës kriminale. Sipas burimeve nga organi i akuzës, hetuesia dhe prokuroria gjykuan se deputeti duhet të mbahet në paraburgim, sepse është i dyshimtë për kryerjen e veprave të tjera penale. Sipas dosjes penale, Kuzilos dyshohet të ketë marrë pjesë në sulmin që kryen pjesëtarë të ”Agimit të Artë” në Kerasini, rreth katër muaj pas vrasjes së këngëtarit Pavlos Fisas.

HermesNews - ©2014

Dërgo me email | Stampo artikullin