22/06/2014 16:07:36

Vlorë, shëmben ndërtimet pa leje

Vazhdon aksioni i prishjes së ndërtimeve pa leje përgjatë bregdetit, nga Skela në Ujë të Ftohtë

VLORE - Inspektoriati Ndërtimor Urbanistik Kombëtar(INUK), i mbështetur nga Policia e Shtetit, po vazhdon aksionin e prishjes së ndërtimeve pa leje përgjatë bregdetit, nga Skela në Ujë të Ftohtë në qytetin e Vlorës, për t’i hapur rrugë zbatimit të projektit të ndërtimit të një shetitoreje të financuar nga qeveria.

Gjatë këtyre ditëve, veprimet janë përqëndruar në krahun e sipërm të rrugës, duke shembur godina, lokale, shtëpi banimi e garazhe, të cilat janë ndërtuar në periudha të ndryshme kohore, para dhe pas vitit 1990-të, pjesa më e madhe pa lejen e organeve përkatëse, duke cënuar standardet urbanistike në këtë zonë. Për realizimin e këtij aksioni, janë njoftuar më parë pronarët, një pjesë prej të cilëve kanë vepruar vetë, duke larguar pajisjet e orenditë, apo duke çmontuar pjesë të caktuara në strukturat e godinave respektive, ndërkohë që për godinat ekzistuese të ndërtuara para vitit 1990-të, janë zbatuar procedurat e shpronësimit.

E gjithë zona, nga Skela në Ujë të Ftohtë, tashmë pothuajse është çliruar nga pesha e këtyre ndërtimeve pa asnjë kriter, ndërkohë që është krijuar një hapësirë e madhe mes brezit të pallateve shumëkatëshe dhe detit. Pjesë e veprimeve kanë qenë edhe verandat dhe tendat me strukturë prej druri, të ngritura nga pronarët e lokaleve në katet e para në pallatet e ndërtuara përgjatë këtij segmenti të bregdetit të Vlorës.

Ky aksion i INUK është mirëpritur nga opinioni qytetar vlonjat. Dhjetra persona janë shprehur se, kjo hapësirë bregdetare po u kthehet qytetarëve. Për vite me rradhë, në forma të ndryshme, ata ishin privuar nga këto resurse të natyrës. Objektet e ngritura, në pjesën më të madhe në mënyrë abuzive dhe në kundërshtim me kriteret urbanistike, qoftë në pjesën e rërës, apo në krahun e kundërt të rrugës, kishin cënuar standardet e shfrytëzimit dhe përjashtuar masën e gjerë të qytetarëve.

Faza e parë e aksionit për prishjen e tyre, nisi në fillim të muajit nëntor të vitit të kaluar, duke shembur fillimisht një godinë 7 katëshe, e projektuar si një objekt rezidencial shumëfunksional, e cila ishte ngritur në territorin ku, dikur funksiononte një nga lokalet simbol të historisë së Vlorës, “Turizmi i Vjetër”. Pronari i kësaj godine e kishte shtrirë territorin e shfrytëzimit, duke zaptuar një sipërfaqe disa herë më të madhe. Pjesë e aksionit ishte edhe prishja e kompleksit “Jon” në bregdetin e Ujit të Ftohtë.

HermesNews - ©2014

Dërgo me email | Stampo artikullin