20/06/2014 21:27:00

Hapa të rëndësishëm kundër trafikut

Në një deklaratë për shtyp ministri i Brendshëm vlerësoi daljen e Shqipërisë nga lista e vendeve në vëzhgim për trafikun njerëzor

TIRANË - Ministri i Brendshëm, Saimir Tahiri deklaroi të premten në mbrëmje se raporti i Departamentit Amerikan të Shtetit (DASH) për trafikun njerëzor është dëshmi e rëndësishme për përpjekjet e qeverisë në luftën kundër trafikut të qenieve njerëzore. Në një deklaratë për shtyp ministri i Brendshëm vlerësoi daljen e Shqipërisë nga lista e vendeve në vëzhgim për trafikun njerëzor, duke e konsideruar këtë një angazhim të përmbushur të qeverisë shqiptare për 300 ditët e para të saj. Tahiri tha se qeveria që në fillim ka qënë e vendosur për ta nxjerrë Shqipërinë nga harta e vendeve me probleme në këtë drejtim. “Qeveria e kaluar, tha ai, e renditi Shqipërinë në listën e vendeve në vëzhgim. Falë punës dhe rezultateve të këtyre muajve, DASH-i vëren se kemi punuar mirë. Ky raport është një vlerësim dhe nxitje për të ecur përpara me ritme më të shpejta në luftën kundër trafikut. Ky raport shënon një angazhim të përmbushur të qeverisë Rama që kurorëzohet me ngritjen e Shqipërisë në nivelin e dytë”, theksoi ministri.

HermesNews - ©2014

Dërgo me email | Stampo artikullin