07/06/2014 18:08:42

Pronësia drejt zgjidhjes. KiE ''OK'' planit të qeverisë

Gjykata e Strasburgut mori vendim pozitiv mbi planin e veprimit, të miratuar nga Qeveria Shqiptare, për kthimin dhe kompensimin e pronave

TIRANE - Komiteti i Ministrave të Këshillit të Europës, i cili mbikëqyr ecurinë e zbatimit të vendimeve të Gjykatës Europiane të të Drejtave të Njeriut, mori dje një vendim pozitiv mbi Planin e Veprimit, të miratuar nga Qeveria shqiptare, në lidhje me zgjidhjen e problemit të kthimit dhe kompensimit të pronave.

Është hera e parë që Komiteti i Ministrave të Këshillit të Europës merr një vendim kaq pozitiv ndaj Shqipërisë, në lidhje me çështjen e kthimit dhe kompensimit të pronave. Kjo falë punës që është bërë këto 6 muajt e fundit nga Qeveria shqiptare.

Gjykata e Strasburgut në dhjetor të 2012-s mori një vendim pilot kundër Shqipërisë, ku i kërkohej palës shqiptare të adresonte çështjen e kthimit dhe kompensimit të pronave në mënyrë të tillë që të mos kishte më shkelje të të drejtave të pronarëve. Fatkeqësisht, deri në dhjetor 2013, kur ne u njohëm me situatën nuk ishte bërë asgjë për këtë gjë. Gjykata ka lënë një afat prej 18 muajsh për adresimin e situatës, afat i cili skadon në 17 qershor 2014.

Ne kemi aplikuar në Gjykatë për shtyrje të afatit, në mënyrë që të kemi kohën e nevojshme për të kryer ato reforma të nevojshme dhe të shumëpritura.

Vendimi i Komitetit të Ministrave të Këshillit të Europës është një vendim politik dhe një mesazh i qartë për mbështetjen që Komiteti i jep politikës së Qeverisë shqiptare. Shpresojmë që dhe vendimi i Gjykatës së Strasburgut të jete po aq pozitiv, sa dhe vendimi i Komitetit të Ministrave të Këshillit të Europës.

"Nëse ky vendim politik i Komitetit do te adoptohet edhe nga Gjykata, ata do të shohin dritën jeshile të zgjidhjes përfundimtare të problemit të pronës", shkruan zyra e shtypit e kryeministrisë gjatë një komunikatë për shtyp.

HermesNews - ©2014

Dërgo me email | Stampo artikullin