04/06/2014 13:20:05

Shqipëria drejt statusit

Fyle në Tiranë, pa dyshim statusi i kandidatit. Meritë e të gjitha qeverive. Rama: PO, e fortë pa rezervë

TIRANE - "Pa pikë dyshimi, KE rekomandon statusin e vendit kandidat", tha Komisioneri për Zgjerim Stefan Fyle, sot në Tiranë. Fyle deklaroi se Shqipërisë duhet t’i jepet statusi i vendit kandidat falë punës dhe përpjekjeve të qeverisë së shkuar dhe asaj aktuale. Kryeministri komenton në facebook. "PO ! Një PO, e fortë pa rezervë për statusin kandidatit për Shqipërinë i rekomandohet vendeve anëtare nga komisioni", shkruan Rama.

Sipas disa mediave në raport shkruhet se: "Në luftën kundër korrupsionit, krimit të organizuar dhe në reformat në sistemin gjyqësor. Shqipëria ka vazhduar të zbatojë dhe të konsolidojë masat e saj përsa i përket reformave që lidhen me BE-në, veçanërisht ato që lidhen me statusin kandidatit."

Reforma të rëndësishme legjislative janë ndërmarrë në luftën kundër krimit të organizuar dhe hetimet kanë dhënë rezultate pozitive në luftën kundër trafikut të lëndëvë narkotike dhe fusha të tjera të krimeve të rënda dhe krimit të organizuar.

Dokumenti i komisionit ndalet edhe në atë se çfarë Shqipëria duhet të bëjë për të ecur më tej në procesin e Integrimit europian. "Eshtë e rëndësishme që qasja sistematike ndaj reformave të vazhdojë ndërsa rezultatet e qëndrueshme do të jenë të një rëndësie kyçe për integrimin e saj të mëtejshëm europian."

Raporti identifikon ndërkohë një numër sfidash që Shqipëria të përparojë në rrugën e saj të integrimit europian. "Shqipëria ka dëshmuar angazhimin e vet për reformën e sistemit gjyqësor, veçanërisht duke punuar me Komisionin e Venecias për të përmirësuar pavarësinë, përgjegjshmërinë dhe profesionalizmin e sistemit", vlerëson raporti.

Në Tiranë po mbahet takimi i tretë i dialogut të nivelit të lartë mbi përparësitë kyçe për shqipërinë. Në emër të qeverisë shqiptare, Ministrja e Integrimit Europian, Klajda Gjosha falenderoi komisionin për mbështetjen në këtë moment të rëndësishëm për vendin.

"Jemi të vendosur të vazhdojmë rrugën e reformave sepse prespektiva europiane e Shqipërisë është prespektiva e së ardhmes", tha ministrja.

Mediat e huaja po ashtu e kanë komentuar gjerësisht raportin. E përditshmja londineze Financial Times thekson në shkrimin e saj se “Bashkimi Europian është i gatshëm të pranojë Shqipërinë si kandidate për anëtarësim, një lëvizje që ka gjasa të hasë në rezistencën e partive populiste anti-europiane që patën sukses në zgjedhjet e fundit europiane.

Këshilli i BE-së, më saktë pesë vende anëtare të BE-së, Gjermania, Franca, Britania, Danimarka dhe Holanda pavarësisht rekomandimit të KE-së për dhënien e statusit për Shqipërinë në tetor të vitit 2013, kërkuan shtyrjen e vendimit për në qershor.

5 vendet skeptike kërkuan nga KE që të përgatisë një raporti ekstra (duke qenë se Komisioni publikon raportet çdo vit në tetor) për Shqipërinë. Duke qenë se dhe raporti i tetorit rekomandonte dhënien e statusit, këto vende kërkuan vazhdimësi në mënyrë që të ishin të sigurta që situata në Shqipëri nuk do të ndryshojë.

BE nuk ka vendosur asnjëherë kundër rekomandimit të KE-së sa i takon procesit të zgjerimit, por pavarësisht progresraportit me nota pozitive dhe plotësimit të kushteve, vendet e BE-së nuk votuan dhënien e statusit, por as nuk e refuzuan.

E vetmja pikëpyetje mbetet vendosja e vetos nga ndonjë prej vendeve anëtare të BE-së. Por, deri më tani asnjë prej 5 vendeve skeptike, të paktën publikisht, nuk ka shfaqur rezerva për Shqipërinë.

Zyrtarisht, Këshilli i BE-së do të marrë një vendim për statusin kandidat të Shqipërisë në takimin e 26-27 qershorit. Në draft axhendën e kësaj mbledhje nuk specifikohet se do të ketë një vendim për Shqipërinë, por në pikën e tretë të çështje që do të diskutohet thuhet se, Këshilli Europian gjithashtu mund të adresojë çështje specifike të marrëdhënieve me jashtë.

Doriana Metollari

Dërgo me email | Stampo artikullin