03/06/2014 20:59:38

Shkodër, tregtarët jashtë tregut më të madh të qytetit

Komuniteti mysliman u merr tregun shitësve me pakicë. Bashkia pa asnjë zgjidhje

SHKODER - Tregu më i madh i shitjes me pakicë në Shkodër, ai i "Zdrales" ka 20 vite që shfrytëzohet dhe administrohet nga Bashkia, me marrëveshje dypalëshe midis saj dhe tregtarëve. "Myftinia Shkodër gjatë gjithë këtyre viteve nuk ka marrë asnjëherë të ardhura nga kjo pronë e shenjtë vakëf, në origjinë, megjithëse ka bërë tentativa për vjelje të përbashkët të të ardhurave të qirasë me Bashkinë, përpjekje të parealizuara për arsye të mungesës së lejes së tregut Zdrale. Në tetor të vitit 2013, Myftinisë Shkodër i është bërë kthimi i pronës vakëf në Zdrale, 3782 m2 (tri mijë e shtatëqind e tetëdhjetë e dy m2), e mbajtur në përdorim nga ana e Bashkisë Shkodër gjatë gjithë këtyre viteve", shkruan Mytinia në një komunikatë për shtyp.

Duke marrë në konsideratë edhe problemin social që mund të krijohet në aplikimin e projektit të zhvillimit të kësaj prone, Myftinia Shkodër pas bisedimeve edhe me një përfaqësi të tregtarëve, është angazhuar që të ndërhyjë pranë organeve të Bashkisë Shkodër për të bërë të mundur krijim e një tregu alternativ për tregtarët aktual të Zdrales, si detyrim që Bashkia ka ndaj tyre, mbaron komunikata.

Myftia pas një takimi që bëri sot me tregtarët, propozoi një afat deri më 15 Janar 2015, për gjetjen e një zgjidhjeje ndërmjet tyre dhe Bashkisë, në krijimin e një tregu alternativ për ta.

HermesNews - ©2014

Dërgo me email | Stampo artikullin