30/05/2014 10:22:54

Akuzat që denoncojnë ''ndërhyrje'' të misionit të OPDAT tek Prokuroria

Berisha akuzon punonjësen e misionit amerikan se i ka bërë presion prokurorëve për arrestimin e Syrja Gjokes, çfarë do të ishte shkelje e rëndë e misionit amerikan në Shqipëri. Analiza: A është marrë në pyetje znj. Ibrahimi, në ambasadën amerikane, për këtë takim ?

TIRANE - Ish kreu i PD-së Sali Berisha akuzon Alba Ibrahimin, punonjëse e misionit amerikan OPDAT, për presion ndaj prokurorëve për arrestimin e gjeneral Syrja Gjokës. Berisha mbështet se punonjësja e OPDAT-it, Ibrahimi, e cila është motra e Mimi Kodhelit, u ka bërë presion prokurorëve. "Ka nisur motrën e saj...në emër të e OPDAT- it, duke folur në emër të misionit, ku aty është thjesht punonjëse, duke u bërë presionin më të jashtëzakonshëm prokurorëve. Dhe jo një, po dy prokurorëve", ka thënë Berisha dje në seancë plenare. Akuza që shkojnë dhe në kërcënime sipas tij: "ose Syrja Gjoka në litar, ose ju do humbisni, sepse kështu është vendosur. Znj. Alba (Ibrahimi) Vata ka ndërhyrë me insistim që të hapet çështje penale ndaj gjeneral Syrja Gjokës", ajo çfarë është më alarmante është fakti që këto akuza janë bërë në emër të OPDAT-it, por "refuzuar nga prokurorët tek të cilët ajo ka ndërhyrë", tha Berisha.

"Nuk kam asnjë dijeni se misioni i OPDAT-it ka tagër të ndërhyjë në çështje penale të veçanta", thotë Berisha.

I menjëhershëm reagimi Ambasadës Amerikane. "Z. Berisha pretendoi se një punonjës shqiptar i ambasadës ishte përpjekur të ndërhynte në një çështje hetimi penal në proces, thjesht mbi bazën e marrëdhënies së punonjësit të ambasadës me një anëtar të Këshillit të Ministrave. Pretendimi është tërësisht i pavërtetë dhe i pabazë", shkruan ambasada në komunikatën për shtyp, çfarë do të thotë, ajo pretendon që Berisha nuk ka asnjë provë rreth këtyre presioneve dhe nga ana tjetër Ambasada shkruan për, "nivelin më të lartë të integritetit dhe llogaridhënies të secilit anëtar të misionit tonë".

Ambasada nuk ka dhënë asnjë detaj rreth faktit nëse Znj. Ibrahimi ka patur kontakt të drejtëpërdrejtë me prokurorët dhe nëse brenda ambasadës amerikane znj. Ibrahimi e pohon apo jo një takim të tillë që mund të ketë patur me prokurorët. A ishte në dijeni ambasada ? Nëse po, takimi ka qenë në emër të misionit, apo privat ? A është marrë në pyetje znj. Ibrahimi, në ambasadën amerikane, për këto akuza ?

Syrja Gjoka u arrestua me 16 Maj të këtij viti për shkak të akuzave "për shpërdorim detyre". Ai akuzohet të jetë përgjegjës për shkatërrimin e shtatë objekteve të armatosura pa marrë leje nga eprorët e tij. Ai akuzohet se ka fallsifikuar dhe firmat e disa anëtarëve të komisionit që vendosnin për objektet që do të prisheshin.

Doriana Metollari

Dërgo me email | Stampo artikullin