28/05/2014 21:44:00

QKR dhe prepotenca për siguri

nga Doriana Metollari

HermesNews - Të gjithë ata që hynin në dyert e Qëndrës Kombëtare të Rregjistrimit në Tiranë, mbyllnin gojën, por punonjësit e QKR-së brenda dhomave të gjera të katit të parë, dukeshin se ishin mësuar me pozicione jo shërbyese, komanduese ndaj tyre.

Brenda atyre dyerve përveç veshjeve ka shumë pak profesionalizëm tjetër. Njerëzit trajtohen me një konfidencë që është diçka ndërmjet mirësjelljes së tepruar, dhe prepotencës si formë e sigurisë së nëpunësave.

Një distancë pune e shoqëruar me një sjellje institucionale është një objektiv ende i largët për këmishat me kollare të zezë dhe zonjat që flisnin me klientët njësoj sikur të meditonin me veten.


Pozicione komanduese me tone të rënda imponuese dhe një ironi që është diku mes "po bëj atë që më duhet, por dije se ma ke nevojën". Fraza që ishin të vlefshme për denoncime në çdo vend me demokraci europiane, përdoreshin ndaj klientave duke filluar që tek sekretarja bionde në korridor, një vajzë rreth të 25-tave me një sjellje joprofesionale dhe konfliktuale me njerëzit.

Në çdo vend të BE-së njerëzit do të kërkonin me zë të lartë që dikush duhej t’a kishte stërvitur më mirë në marëdhëniet me publikun, por në Shqipëri, çuditërisht, qytetarët rrallë herë e shfaqin hapur pakënaqësinë kur dikush u prek integritetin; s'ka rëndësi nëse punonjësit e QKR-së marrin rrogat prej tyre. Ata prapë nuk flasin.

Është turp.

QKR-ja për të cilën flas ndodhej në zonën e bllokut, afër parlamentit, duhej të ishte më e madhja në Tiranë. Pagesat brenda institucionit bëhen nëpërmjet sporteleve të një banke, një metodë kjo, për mënyrën sesi e kuptova unë, që lufton korrupsionin brenda punonjësve të administratës. Megjithatë dikush duhet të ketë durimin të luftojë dhe me prepotencën e personelit, ose të fillojë të punësojë ata që kanë përulësinë të mësojnë dhe të shërbejnë duke u ndjerë krenar për atë që bëjnë.

HermesNews - ©2014

Dërgo me email | Stampo artikullin