28/05/2014 17:56:58

PD: Genart Gjashta i akuzuar për trafik në Greqi

Akuza/ Drejtori i shërbimeve dhe personelit në prefekturën e tiranës akuzohet si i dënuar me 10 vite burg nga apeli në Greqi në vitin 2004. Prefektura i mohon dhe paraqet vërtetimin e vitit 2008 dhe 2014 të gjykatës shqiptare. Po vërtetimi i vitit 2004 i apelit në Greqi ku është ?

TIRANE - Selia blu bën të ditur se i emëruari si Drejtor i shërbimeve dhe personelit në prefekturën e tiranës ka qenë i dënuar me 10 vite burg për trafik droge. Lajmi u dha nga zëdhenësja Laura Vorpsi. "Kryeministri Edi Rama ia ka besuar shërbimet dhe personelin e Prefekturës së Tiranës, më e madhja në vend, një të dënuari me 10 vite burg për mbajtje dhe trafik droge në Greqi", tha ajo.

Në dokumentat që Vorpsi publikoi sot (fotot), shkruhet për një ankesë që Genart Gjashta kishte bërë në gjykatën e Strasbourgut, ndaj shtetit grek, për vonesën që ky i fundit i kishte bërë çështjes së tij në apel.

Ai është dënuar fillimisht nga gjykata e shkallës së parë në Greqi me 16 vite burg, sipas Vorpsit. Më pas Gjykata e Apelit në Greqi, në vitin 2004, ka lënë dënimin me 10 vite burg, me akuzën e mbajtjes dhe trafikimit të lëndëve narkotike.

Duke e cilësuar këtë akuzë "shpifje" dhe duke publikuar dy vërtetime të gjëndjes gjyqësore të Genart Gjashtas, të viteve 2008 dhe 2014, Prefekti i Tiranës, përgjigjet sot se, "Puna e Genart Gjashta ka sjellë model krejt të ri në menaxhimin e administratës, ndryshe nga ai i trashëguari ku punonjësit ushtronin detyra pa dorëzuar dosje personale dhe që i viheshin në shërbim partisë-shtet".

"Duke u distancuar me neveri ndaj këtyre akuzave, institucioni i prefektit të qarkut Tiranë kërkon që të sqarojë për mediat dhe publikun se Genart Gjashta nuk ka qenë asnjëherë i dënuar, gjë e cila vërtetohet nga vërtetimet e gjendjes gjyqësore të vitit 2008 dhe 2014", shkruhet në deklaratë.

Analiza - > Vërtetimet e gjëndjes gjyqsore të vitit 2008 dhe 2014 nuk mund të përgënjështrojnë akuzat e PD-së, për dy arsye: a) nuk janë vite në të cilat Gjashta akuzohet të jetë dënuar, por vërtetime që lëshohen si proçedurë për poste dhe b) nuk janë vendime të gjykatës greke por shqiptare, prandaj nuk i përgjigjen akuzave të PD-së. Nga ana tjetër as selia blu nuk është transparente në këto akuza, pas ajo ka paraqitur vetëm dokumentin e Strasburgut dhe jo vërtetimin gjyqsor të Apelit në Greqi. Në të dyja dokumentet e paraqitura nga prefektura, Gjashta rrezulton të jetë i padenuar, por këto vërtetime janë të vlefshme vetëm për Republikën e Shqipërisë dhe jo të Greqisë. Një gjykatë shqiptare nuk mund të lëshojë vërtetime për gjëndjen gjyqsore për krim që mund të ketë ndodhur jashtë kufinjve dhe për të cilat gjykata nuk ka marrë asnjë vendim. Prandaj këto prova të paraqitura nga Prefektura janë të pamjaftueshme. Ateherë cili prej politikanëve të PD-së ka vërtetimet e gjykatës së apelit në Greqi dhe çfarë është më e rëndësishme a ekzistojnë vërtetë këto vendime ? Nëse po, ku janë ?

Doriana Metollari

Dërgo me email | Stampo artikullin