20/05/2014 18:58:05

Zbulohet banda C4: sekuestrohet sasi rekord

Operacioni i policisë së tiranës; kapen në flagrancë prodhuesit e tritolit

TIRANE - Katër persona kanë rënë në pranga, tre nga tirana dhe një nga kruja, pas finalizimit me sukses të një operacioni që çoi në zbulimin e një bande kriminale që prodhonte tritol C4.

Brenda 3 vitesh kishin arritur të shisnin 100 kg eksploziv C4 dhe kishin gati për shitje dhe 96 kg eksploziv e cila do të përdorej për ngjarje të ndryshme kriminale.

Operacioni u zhvillua në rrugën "Sadik Petrela" në Tiranë.

Drejtori i policisë së kryeqytetit Ardian Cipa e cilësoi si sasinë më të madhe të tritolit e sekuestruar në vendin tonë.

"Falë një pune të mirëorganizuar...në një hapësirë kohore disa mujore u arrit të goditej një grup kriminal i implikuar në prodhimin dhe shitjen e lëndës eksplozive C4. Si rezultat i oporeacionit u arrit sekuestrimi i një sasie të konsiderueshme eksplozivi dhe arrestimi në flagrancë i katër personave, pjesë e një grupi të struktuaruar kriminal", tha ai. Të arrestuarit janë, Ilir Dhimo 36, Pëllumb Daci 46, Emil Taku 27, Artur Çelo 40.

Të arrestuarit janë kapur kur po shisnin lëndë eksplozive dhe gjatë ndërhyrjes policore kanë tentuar të largohen për t'ju shmangur arrestimit.

Gjatë kontrollit në banesat e tyre janë gjetur, eksploziv plastik i llojit C4 96 kg, Fitil dhe donatorë 37 kg, ndezësa të minave 3744 copë, kapsolla detonatore 2927 copë, kapsolla detonatore elektrike 387 copë, kapsolla elektronike detonatore me trup bakri 101copë, kuti plastike 501 copë, si dhe prova të tjera.

Nga 2011 deri tani grupi shiti 100 kg eksploziv C4.

Banda ka nje histori te pasur me ngjarje kriminale te ndodhura ne Kruje dhe Tirane. Policia po punon për identifikimin e personave të tjerë që kanë lidhje me bandën.

HermesNews - ©2014

Dërgo me email | Stampo artikullin