20/05/2014 16:59:33

Tre karakteristika të shkodrës

nga Doriana Metollari

HermesNews - Jo se nuk gjen nëpër qytete të tjera trëndafila, por në Shkodër, në mënyrë të veçantë një prej tyre, është kultivuar historikisht nëpër familjet shkodrane.


Maragjyli - > E gjen zakonisht nëpër shtëpi private varur mbi muret rrethuese të saj. Nga të gjithë trëndafilat, ky lloj në veçanti ka aromë karakteristike. Në Shkodër, njihet me emrin Maragjyl. Lulja, tipike e majit, zbukuron rrugicat e shtëpive private, me lulet që varen sipër mureve duke lëshuar profumin e vet për të gjithë ata që i kalojnë afër. Shumë kompozitorë i kanë kënduar Maragjylit nëpër jaret shkodrane. Kjo lule është karakteristikë e shkodrës. Petalet e tij përdoren dhe si shurup pasi këtu është Bio.


Kanarinat - > Është tipike e shkodranëve të mbajnë kanarina. I mbajnë nëpër kafaza dhe tregtarët e frutave jashtë. Një herë kam parë njërin që kishte rreth 30 kafazë kanarinash në faqet e dyqanit të frutave ku blinin qytetarë të ndryshëm. Kanarinat mbahen të varura jashtë derës hyrëse tek artizanë dhe sidomos berberët e vjetër shkodran. Është traditë të mbash kanarina në Shkodër. Rrallë herë mund të ndalësh tek ndonjë artizan, e të mos dëgjosh cicërimat. Kanarinat pëlqehen kaq shumë sa janë dhe tregti. Një kanarinë që këndon (dhe është art më vete të bësh të këndojë një kanarinë), mund të kushtojë në treg 15 - 20 mijë lekë (të reja), ndaj shumëkush i mban dhe për tregti, por ishte surprizuese të zbuloja se, kanariat, dhe pse kushtojnë shumë, tregu i tyre nuk mungon në Shkodër.


Klubet e burrave - > Sinqerisht dyshoj që të mos ketë klube bastesh dhe nëpër qytete të tjera, por klubet e burrave, si koncept ka ekzistuar qëkur këtej pari. Përgjithësisht janë klube të vogla, jo në zona qëndrore, jo elegant, me patjetër panoramë nga rruga. Shërbimi është i shpejtë dhe kamarierët nuk kanë kapadajllëk. Quhen klube - burrash, për shkak se aty pinë kafe vetëm burra që duan të rrinë e të kuvendojnë me burra, për punë, ose thjesht për të kaluar kohën duke vënë baste. Në Shkodër, klubet e burrave janë përgjithësisht plot. Në këto lokale nuk ulen femra. Popullohen nga meshkuj që pinë kafen jashtë, nëpër tavolinat që zënë trotuaret kur ngrohet koha. Kafe dhe raki, është shumë e shpeshtë të porosisin, por nuk ulen për të folur aq sa për të kaluar kohën duke parë femrat që i detyrojnë të zbresin në rrugë për të ecur, apo thjesht për t'iu shmangur batutave të qejfit. Nuk e di nëse prezencave e femrave, do të mund të zbuste pak kulturën e klubit të burrave, por di që nëse ndonjëra do të ulej aty, kamarieri duke iu afruar me hap të sigurt, do t'i pëshpëriste, "zonjë, kjo është zona e burrave". Nuk gjen kamariere femra. Klubet e burrave janë shumë pak të kushtueshme, aty një kafe kushton 50 - 60 Lekë dhe çuditërisht cilësia esaj është e mirë, çfarë në shumë lokale luksi nuk ndodh. Prandaj do t'u sugjeroja femrave që të rishikojnë dhe njëherë veton aty.

HermesNews - ©2014

Dërgo me email | Stampo artikullin