16/05/2014 19:30:00

Mbërrijnë arrestimet VIP

Llalla zbulon kartat, hetimet që po përfundojnë do të ndikojnë në fatet e integrimit të Shqipërisë

TIRANE - Në ditët e ardhshme, ndoshta do të shohim surpriza në skenën e arrestimeve, radha VIP, arrestime që do të ishin të parat në historinë postkomuniste të Shqipërisë. Hetimet ndaj zyrtarëve të veshur me pushtet, "do të ndikojnë në integrimin e Shqipërisë", tha sot kryeprokurori Adriatik Llalla.

Në një tryezë të përbashkët me Ministrin e Brendshëm, Saimir Tahiri, mbi bashkëpunimin Prokurori - Polici, Llalla foli për disa "dosje mjaft të rëndësishme", që prokuroria ka në dorë.

"Kemi në proçes hetimi mjaft raste të rëndësishme, të cilat nëse do të rezultojnë të suksesshme mund të kenë ndikim të rëndësishmë në ardhmen europiane të vendit. Janë vendosur përballë përgjegjësisë ligjore zyrtarë të niveleve të ndryshme, prokurorë, gjyqtarë, grupe apo struktura të ndryshme kriminale", tha Llalla.

Asnjë emër, por Llalla premtoi arrestime të bujshme, në ditët e ardhshme.

Prokuroria dhe Policia do të punojnë së bashku, me të gjitha kapacitetet profesionale, dhe "veprimet hetimore të nevojshme për të hapur dhe çuar përpara deri në dënimet penale nga gjykatat, të gjitha çështjet e mbetura pezull, por që janë mjaft sensitive për rendin ligjor dhe shtetin e së drejtës, veçanërisht ato më të rëndësishmet për të cilat drejtësia e qytetarëve presin përgjigje që ne nuk mund të lejojmë të kthehen në simbol të padrejtësisë, pabarazisë dhe pandëshkueshmërisë, si Gërdecin , 21 Janarin, evazionin fiskal të mashtrimeve të tatimeve në rendin e milionave eurove, zyrtarë të lartë ndoshta në nivelet më të larta të kallëzuar për shpërdorim detyrë e korrupsion", tha Ministri i brendshëm Saimir Tahiri.

Policia e Shteti ka proçeduar mbi 180 punonjës të saj në të gjitha nivelet. Tahiri bën thirrje për “pastrimin” e agjencive ligjzbtuese nga persona abuzues. "Kam bindjen se e njëjta gjë duhet të ndodhë edhe me agjencitë e tjera ligjzbatuese, sepse pastrimi i tyre nga abuzuesit me detyrën e të korruptuarit ndaj atyre që bëjnë detyrën ndaj politikës dhe krimit më së pari dhe jo ndaj ligjit dhe drejtësisë qoftë në Polici, Prokurori apo Gjykatë, është detyrimi ynë ligjor për garanci dhe standarde të larta në luftën kundër krimit të organizuar dhe korrupsionit elitar", tha Tahiri. //HermesNews - ©2014//

Doriana Metollari

Dërgo me email | Stampo artikullin