14/05/2014 12:01:25

Financimi i errët i partive politik

Tryezë për kontrollin e financimit të partive politike

TIRANË - Përmirësimi i regjimit të kontrollit të financimit të partive politike gjatë fushatave zgjedhore po diskutohet sot në një tryezë teknike të nivelit të lartë, e organizuar nga Komisioni Qendror i Zgjedhjeve dhe Prezenca e OSBE-së, në Tiranë.

Në fjalën e tij, ambasadori i OSBE-së, Florian Raunig tha se financimi i partive është çështje përgjegjshmërie, integriteti, transparence dhe demokracie. “Sa më të përgjegjshme të jenë partitë politike aq më e fortë do të jetë demokracia në Shqipëri”, nënvizoi ai.

Raunig e vuri theksin tek mangësitë në legjislacion, i cili nuk ofron transparencë të mjaftueshme në raportimin e fondeve në fushatë. “Ligji aktual nuk vendos detyrimin për partitë që të bëjnë publike financimet e tyre, para ditës së zgjedhjeve.

OSBE/ODIHR rekomandojnë që për rritjen e transparencës së financimeve në fushata, partitë duhet të raportojnë rregullisht në KQZ për të gjitha të ardhurat dhe shpenzimet e bëra. Po ashtu, KQZ duhet të publikojë raportet financiare paraprake, para ditës së zgjedhjeve”, tha Raunig.

Kreu i OSBE-së vlerësoi se partitë politike duhet të shërbejnë si model i integritetit në shoqërinë shqiptare dhe të vendosin në qendër të vendimeve të tyre interesin e publikut. Në të kundërt, tha ai, mungesa e integritetit dhe transparencës mes partive dobëson proceset demokratike të vendit dhe dëmton ekonominë dhe kjo lidhet drejtpërdrejtë me sigurinë dhe stabilitetin afatgjatë.

Ambasadori i OSBE-së, duke iu referuar një raporti të Transparency International të vitit 2013, tha se shumica e shqiptarëve kanë një perceptim disi negativ për partitë politike. “Le ta marrim këtë si një sfidë të përbashkët për të përmirësuar reputacionin e politikës në përgjithësi dhe për të punuar drejt respektimit të plotë të parimeve transparencës dhe integritetit me realitetin politik shqiptar.

HermesNews - ©2014

Dërgo me email | Stampo artikullin