13/05/2014 19:51:49

Acarohet situata politike. Vjen paralajmërimi i dytë i demokratëve

Selia blu kërkon dorëheqjen e Kryeministrit. Protesta të enjten. Edi Rama flet

TIRANE - Kryeministri i shqipërisë Edi Rama mohon pretendimet e opozitës për përfshirje të qeverisë, apo vetë atij në trafik droge. "Një shfaqje të shpifur politike", i ka quajtur akuzat e demokrateve. "Një avion i ulur çuditërisht në rërë nga një profesionist italian, në ditën me diell, pasi fluturon aq sa për t’u pikasur nga njerëz, për t’u fotografuar e filmuar; një makinë e rastisur pikërisht aty plot me drogë. Piloti, një italian që s’kishte kaluar kurrë në atë rrugë, i ndodhur në pyllin e Divjakës. Me një parti në opozitë, që me të dalë titrat në televizione, lëshohet me kuç e me maç kundër meje, kundër Ministrit të Brendshëm, kundër policisë, kundër interesit kombëtar; pa asnjë skrupull, pa asnjë sens mase, pa asnjë respekt për kohën që i duhet të vërtetës të dalë në shesh. S’ka asgjë të vërtetë në asjë fjalë, asnjë fjalë që lidh emrin tim me të zezat e të këqijat e këtij vendi që e dua me gjithë fuqinë time dhe ndaj jush që ju detyrophem gjithë jetën pë këtë nder që më keni bërë për të më vënë në krye të qeverisë. Nuk jam bërë kryeministër për tu bërë i pasur", tha ai.

Ish kryeministri Sali Berisha fton qytetarët t’i bashkohen protestës së të enjtes për të rrëzuar qeverinë Rama-Meta e cila sipas tij "e ka kthyer vendin në komb të drogës. Ne nuk meritojmë të jemi kombi i drogës. Ka vetëm një rrugë, të përballemi me largimin e tyre sa më parë. Baronët e drogës dyshja Rama-Meta menduan se do ta kalonin me mushkonja. Ju garantoj se shumë shpejt në Shqipëri do të vijnë nëndetëset e drogës. Do ju thonë se ishin balena. Grupet e trafikut disponojnë nëndetëse nga më të sofistikuarat. Kjo është e ditur dhe pastaj dëgjoni historinë e balenave. Situata është dramatike. Shqipëria ka probleme të shumta. Ftoj qytetaret që agjendën nr 1 të vendosin vendimin për të shpëtuar nga qeveria e drogës. Qeveria që duhet të na mbrojë nga krimi qëndron në krye të trafiqeve. Të nisin betejen të enjten të zotuar të vendosur për të largimin e kësaj qeverie të drogës. Nëse duam të kemi të ardhme të mirë duhet të ngrihemi. Këta që duan të na shndërrojnë në shoqërinë e drogës për tu bërë miliardë janë armiqë. Ka vetëm një rrugë të përballemi për largimin e tyre sa më pare,” tha Berisha në një konferencë për shtyp të organizuar në zyrën e tij. "Rama kurrë nuk dorëhiqet, duhet hequr," tha ai. //HermesNews - ©2014//

Doriana Metollari

Dërgo me email | Stampo artikullin