11/05/2014 11:29:14

Ndryshimet klimatike sipas shefit të NASA-s

Ndryshimet klimatike sipas shefit te Nasa-s dhe projektet e ardhsme te agjensise hapesinore

NASA- Efektet e ndryshimeve klimatike që po pëson planeti ynë janë të dukshme edhe nga hapësira.
Këto janë fjalët e shefit të NASA-s Charles Bolden. Sipas tij ndryshimet klimatike si pasojë e ndotjes së mjedisit nga pakujdesia e njeriut do kenë pasoja ekstreme një ditë.

“Mund t’i shohim që tani ndryshimet rrënjësore që po pëson ambjenti, madje dallohen lehtë edhe nga satelitët tanë në hapësirë. Metoda e vëzhgimit me anë të satelitëve është shumë e rëndësishme dhe e frytshme për shkencëtarët përsa i përket ndryshimeve të dukshme në nivel global si për shembull shkrirja e akullnajave polare, reshjet në pika ekstreme, ndryshimet termike, ngritja e nivelit të detit dhe pasojat mbi ekosistemet pyjore” – është shprehur ai.

Bolden shpjegoi gjithashtu se agjensia hapësinore ka projekte madhore në 2014 për t’u përballur konkretisht me këto probleme. Pra do të lëshohen 5 misione në hapësirë për të vëzhguar disa nga problemet dhe rreziqet kryesore që i kanosen planetit tonë.
Duke filluar nga muaji shkurt, NASA në bashkëpunim me agjensinë hapësinore japoneze, kanë lëshuar në hapësirë një satelit vëzhgues mbi çorientimet e reshjeve në nivel global.

Në muajin korrik e ka rradhën “Orbiting Carbon Observatory 2” , i cili do të merret me matjen e dioksidit të karbonit në atmosferën tokësore. Faktikisht ky do të jetë një zëvendës i satelitit të parë që dështoi gjatë lëshimit në hapësirë në vitin 2009.

Dy mjete të reja të agjensisë hapësinore amerikane për monitorimin e klimës do t’i dorëzohen Stacionit Hapësinor Ndërkombëtar. Bëhet fjalë për RapidScat, i cili është në gjendje të masë rrymat oqeanike dhe drejtimin e erës, ndërsa LIDAR do të masë transportin e aerosolit dhe të grimcave në atmosferën tokësore.

Së fundmi, në nëntor 2014 do të lëshohet gjithashtu edhe një sondë për të matur lagështinë e tokës me qëllim për të monitoruar më tej shkrirjen e mundshme të permafrostit. Pra një sërë masash dhe iniciativash që do të ndihmojnë qeveritë dhe shkencëtarët për t’u bërë ballë ndryshimeve klimatike ekstreme tashmë në punë e sipër.

Daniela Vathi

Dërgo me email | Stampo artikullin