10/05/2014 19:10:35

Totozhani ne Serbi

Te njihen diplomat e shqiptareve

TIRANË - Me ftesë të Ombudsmanit të Republikës së Serbisë, Sasa Jankovic, Avokati i Popullit, Igli Totozani, zhvilloi një vizitë zyrtare dy ditore në Beograd.

Sipas njoftimit zyrtar, takimi ndërmjet ombudsmanëve bëri të mundur që të fuqizohen akoma dhe më tej marrëdhëniet bilaterale ndërmjet palëve, kjo dhe në kuadër të Rrjetit Ballkanik të Ombudsmanëvë i cili gjatë këtij viti është nën koordinimin e Avokatit të Popullit të Shqipërisë.

Gjatë takimit me homologun serb u diskutua gjërësisht mbi rolin e rëndësishëm që kanë institucionet e ombudsmanit, si institucione apolitike, në fuqizimin e bashkëpunimit rajonal në dobi të qytetarëve. Një nga pikat që u diskutua është dhe njohja nga shteti serb e diplomave të shqiptarëve të lugines së Preshevës që kanë studiuar në Shqipëri dhe Kosovë.

Ombudsmani i Serbisë ritheksoi që institucioni do të jetë në shërbim të gjithë atyre qytetarëve, brenda kompetencave ligjore, që hasin pengesa në procesin e njohjes së diplomave, të tilla si vonesa proceduriale, apo refuzime të njohjes.

Nga ana tjeter Ombudsmani i Serbisë u angazhua që do të fillojë të ndjekë me iniciativë gjendjen e të burgosurve me shtetësi shqiptare të cilët vuajnë denimin në Serbi, në veçanti të një shtetasi i cili gjendet në kushte jo të mira shëndetësore.

Totozani dhe Jankovic patën një dreke pune me Ambasadorin e OSBE në Serbi, Peter Burkhard ku u diskutua mbi rëndësinë e institucionit të ombudsmanit dhe rolin kyç që ka ky institucion në avancimin e axhendës evropiane dhe bashkëpunimit të mirë rajonal. Me ftesë të Ambasadorit të Bashkimit Evropian në Serbi, Michael Davenport, Avokati i Popullit së bashku me Ombudsmanin e Serbisë morën pjesë në ditën e Evropës.

Gjatë këtij eventi, Totozani pati rastin të takoohej me Kryeministrin e Serbisë, z. Aleksandar Vučić, me ish-Kryeministrin e Serbisë dhe Ministrin aktual të Jashtëm, Ivica Dačić si dhe me një sërë përfaqësuesish të ndryshëm nga organizata të ndryshme ndërkombëtare në Serbi, përfshirë këtu Këshillin e Evropës dhe organizata të ndryshme të shoqërisë civile.

Gjithashtu,Totozani pati takime dhe me deputet nga Presheva dhe Bujanoci, z. Riza Halimi dhe me z. Shaip Kamberi. Gjatë këtij takimi, në të cilin ishte i pranishëm edhe z. Ernal Filo, i ngarkuari me punë pranë Ambasadës së Shqipërisë në Beograd, u diskutua mbi problematikat kryesore që kanë shqiptarët që banojnë në këto zona, dhe në rëndësinë që ka fuqizimi i standardeve të të drejtave të njeriut për një bashkëjetesë në harmoni ndërmjet qytetarëve të të gjitha përkatësive etnike.

Gjatë ditës së dytë të qëndrimit në Serbi, Totozani, së bashku me zv. Ombudsmanin e Serbisë, Milos Jankovic, zhvilluan një vizitë, të parën të përbashkët, në Luginën e Preshevës. Gjatë kësaj vizite ata patën takime pranë zyrës rajonale të OSBE në Bujanoc.

Zoto Totozani shprehu mirënjohjen e thellë për rolin e jashtëzakonshëm që luan në këtë zonë kjo organizatë. Gjatë takimit u prezantuan projektet dhe iniciativat e ndryshme për fuqizimin e harmonisë ndërmjet qytetarëve të kësaj zone. Një takimi i z. Totozani u mbajt dhe pranë zyrës rajonale të Ombudsmanit të Serbisë në Bujanoc, ku ndër të tjera z. Totozani u njoh me ankesat e ndryshme që vijnë nga shqiptarët në këtë krahinë. Në vijim, Totozani së bashku me zv. Ombudsmanin e Serbisë patën një takim me Kryetarin e Këshillit Kombëtar Shqiptar, z. Galip Beqiri.

Gjatë takimit me përfaqësuesit nga Këshilli Kombëtar Shqiptar, u vu theksi në vështirësitë që hasin shqiptarët e Luginës së Preshevës, që banonojnë në jug të Serbisë.

Totozani u shpreh mjaft i kënaqur për këtë takim mes KKSH dhe zv. Ombudsmanit të Serbisë dhe ftoi KKSH dhe të gjithë qytetarët e kësaj zone që të shfrytëzojnë të gjitha hallkat institucionale të Republikës të Serbisë në mënyrë të veçantë Ombudsmanin e Serbisë, i cili është është një instrument i rëndësishëm në adresimin e problematikave të qytetarëve.

Z. Totozani dhe zv. Ombudsmani i Serbisë patën një takim dhe me Drejtorin e Përgjithshem të Policisë së Bujanocit, ku ndër të tjera u diskutua mbi të drejtat e shqiptarëve në këtë krahinë dhe në rolin e rëndësishëm që kanë strukturat e ndryshme shtetërore në garantimin e paprekshmërisë së këtyre të drejtave.

Një takim te veçantë, Totozani zhvilloi dhe me përfaqësuesit nga Këshilli për të Drejtat e Njeriut, përkatësisht me z. Belgzim Kamberi dhe me organizata të tjera vendore joqeveritare. Gjatë takimit u bë me dije situata e të drejtave të njeriut në fusha të ndryshme, përfshirë këtu fushën e sigurisë, të përfaqësimit institucional, të arsimit, si dhe në fushat sociale e ekonomike etj.

Nga ana tjeter, Avokati i Popullit shprehu gadishmërinë e tij për të siguruar praktika pune për studentët nga kjo zonë, që studiojnë në Shqipëri, pranë institucionit të Avokatit të Popullit në Shqipëri, në mënyrë të tillë që të fuqizohen akoma dhe me tej kapacitetet profesionale në fushën e të drejtave të njeriut.

Edhe në këtë takim, Totozani ripërsëriti rekomandimin e tij që organizatat e të drejtave të njeriut dhe qytetarët për trajtimin e shqetësimeve, apo problemeve që hasin të shfrytëzojnë me efikasitet të gjithë kuadrin legjislativ dhe institucional të Republikës të Serbisë dhe në mënyrë të veçantë të forcimit të bashkëpunimit me Ombudsmanin e Serbisë

. Në prononcimin që pati për gazetarët, ai u shpreh se “është e rëndësishme të dihet që ne ombudmsnaët jemi institucione që nuk kemi natyrë politike. Ne nuk merremi me politikë. Ne trajtojmë në territorin e shtetit të secilit, problemet që kanë lidhje me të drejtat e njeriut, që shqetësojnë qytetarët. Ndaj jam i gëzuar sot që gjendem së bashku me zv. Ombudsmanin e Serbisë në Bujanoc”.

“Kjo është një vizitë mjaft e sukseshme do të thoja rezultative dhe e rëndësishme në bashkëpunim me ombudsmanin e Republikës të Serbisë. Mendoj se kemi hapur një faqë të re në bashkëpunimin tonë, një bashkëpunim të ngushtë në dobi të qytetarëve tanë”- përfundoi Totozani./a.gegvataj

HermesNews - ©2014

Dërgo me email | Stampo artikullin