10/05/2014 19:06:47

Gati zyra e kontrollit te zyrtareve

Ligji i ri parashikon si mision të Shërbimit garantimin e zbatimit të ligjit dhe interesave të publikut, mbrojtjen nga veprimtaria e mundshme kriminale dhe e kundërligjshme, e kryer nga punonjës të veçantë të strukturave, pavarësisht nga funksioni apo grada

TIRANË - Shërbimi për Ankesat dhe Çështjet e Brendshme do të emërtohet paskëtaj Shërbimi i Kontrollit të Brendshëm, funksionimi i të cilit pritet të reformohet thellësisht, pas miratimit në Kuvend të një projektligji, që qeveria ka përcjellë së fundi për shqyrtim në parlament.

Një pr/ligj i plotë, i përmbledhur në 97 nene, përcakton misionin, organizimin, funksionimin dhe rregullimin e pozitës juridike të Shërbimit për Ankesat dhe Çështjet e Brendshme (SHAÇB), si dhe karrierën, detyrat, të drejtat e përgjegjësitë e punonjësit të këtij shërbimi, që deri tani ka funksionuar sipas ligjit të vitit 2008.

Nenet e draftit të ri përcaktojnë se SHAÇB e ushtron veprimtarinë e tij ndaj strukturave të Policisë së Shtetit, strukturës përgjegjëse për ruajtjen e personaliteteve të larta shtetërore dhe objekteve të rëndësisë së veçantë, si dhe strukturës së mbrojtjes nga zjarri.

Ligji i ri parashikon si mision të Shërbimit garantimin e zbatimit të ligjit dhe interesave të publikut, mbrojtjen nga veprimtaria e mundshme kriminale dhe e kundërligjshme, e kryer nga punonjës të veçantë të strukturave, pavarësisht nga funksioni apo grada.

Objekt i veprimtarisë së Shërbimit është parandalimi, zbulimi dhe hetimi i veprave penale, si dhe i shkeljeve të ligjit të kryera nga punonjësit e strukturave gjatë ushtrimit të detyrës dhe për shkak të saj; pranimi, administrimi dhe zgjidhja e ankesave ndaj punonjësve të strukturave për mospërmbushje të detyrës sipas standardeve të miratuara me akte normative, për vepra penale dhe shkelje të tjera të ligjit; ruajtja e integritetit të punonjësve të strukturave; kontrolli i pasurisë së pajustifikuar të personave, objekt hetimi, për goditjen e veprimtarisë korruptive dhe kriminale.

Neni 8 përcakton se Shërbimi është strukturë e veçantë e Ministrisë së Punëve të Brendshme, në varësi të drejtpërdrejtë të ministrit, ndërsa statusi i punonjësit të Shërbimit rregullohet sipas këtij ligji. Shërbimi ka një fond të posaçëm që e përdor në funksion të veprimtarisë procedurale penale dhe procesit informativ. Fondi i posaçëm është një zë i veçantë i buxhetit të Shërbimit dhe nuk i nënshtrohet rregullave të prokurimit publik.

Shërbimi drejtohet nga drejtori i Përgjithshëm, me seli në Tiranë, ndërsa Ministri i Brendshëm është autoriteti më i lartë përgjegjës për organizimin dhe veprimtarinë e tij dhe ushtron disa kompetenca në veprimtarinë e Shërbimit, si miratimi i strukturës, përparësitë e veprimtarisë së Shërbimit, etj. Neni 14 i draftit përcakton se Drejtori i Përgjithshëm i Shërbimit emërohet në detyrë dhe lirohet nga ministri, ndërsa janë disa kriteret e emërimit të tij.

Fusha e veprimtarisë informative të Shërbimit bazohet vetëm në të dhënat e marra në përputhje me ligjet përkatëse dhe ushtrohet sipas procedurave të miratuara nga ministri dhe prokurori i Përgjithshëm i Republikës.
Në nene të tjera përcaktohet përcjellja e informacionit, bashkëpunimi me individë, që ndihmojnë në hetimin e çështjeve konkrete, bashkëpunimi me institucione shtetërore dhe private, si dhe bashkëpunimi me agjencitë e huaja.

Mbajtja e armës dhe mjeteve të përdorimit të forcës, e parashikuar në nenin 56, përcakton se të drejtën e mbajtjes së armës e gëzon personeli operacional dhe ai që i lejohet të mbajë armë. Në raste të veçanta, ky personel, përveç armatimit, ka të drejtë të mbajë edhe mjete të tjera të përdorimit të forcës dhe të mbrojtjes, të përcaktuara me urdhër të ministrit.
Me interes është kapitulli që lidhet me testin e integritetit, të cilit, sipas nenit 58, duhet t’i nënshtrohen punonjësit e Shërbimit, me qëllim verifikimin e etikës dhe integritetit të një punonjësi të strukturave.

HermesNews - ©2014

Dërgo me email | Stampo artikullin