10/05/2014 19:03:01

Ekstradohet mashtruesi

Flamur Shahini ishte dënuar me 15 vjet burgim, për veprën penale të Mashtrimit

TIRANË - Zyra Qendrore Kombëtare Interpol Tirana, ekstradoi nga Frankfurti, Gjermani, drejt vendit tonë, Flamur Xhemal Shahini, 52 vjeç nga Mati.

Sipas njoftim zyrtar, 52 vjeçari ishte dënuar me 15 vjet burgim, për veprën penale të “Mashtrimit“.

I ekstraduari Flamur Shahini, nga viti 2004 e në vazhdim, nëpërmjet mashtrimit, duke i premtuar interesa më të larta se bankat e nivelit të dytë, ka mashtruar shtetas të ndryshëm, të cilët i kanë besuar kursimet e tyre.

Nëpërmjet shpërdorimit të besimit ky shtetas ka përfituar shuma të konsiderueshme parash, rreth 72 mijë euro dhe 10.200.000 lekë, nga shtetasit A.T., S.P., H.C. dhe I.D., të cilat nuk i ka kthyer më.

Si rezultat i bashkëpunimit të Interpol Tirana me Interpol Wiesbaden, u bë i mundur arrestimi i tij në Gjermani, me qëllim ekstradimi drejt vendit tonë.

Në Aeroportin “Nënë Tereza” në Rinas, ky shtetas i është dorëzuar përfaqësuesve të Drejtorisë së Përgjithshme të Burgjeve.

HermesNews - ©2014

Dërgo me email | Stampo artikullin