07/05/2014 15:09:08

Opozita kërkon hetim ndaj Didit

RAPORT/ Demokratët paraqesin në komisionin hetimor një video për një operacion të policisë shqiptare ku sipas PD-së u vra një peng

TIRANE - Mbyllet me debate të rënda mbledhja e komisionit hetimor për kontrollin e zbatimit të legjislacionit në fuqi gjatë procesit të lëvizjeve të burimeve njerëzore në Policinë e Shtetit.

Demokratët kanë paraqitur prova të reja ku ndër më të rëndësishmet ishte një video që sipas ish Ministrit të Brendshëm, Deputetit të PD-së, Flamur Noka, shfaqet drejtori aktual i policisë së shtetit, Artan Didi gjatë një aksioni policor.

I menjëhershëm ka qenë reagimi i nënkryetarit të Komisionit, Taulant Balla që nëpërmjet një prononcimi për shtyp tha se PD kërkon të baltos figurën e drejtorit të Policisë, por që në të vërtet e lartëson burrërinë e tij.

Sipas Ballës, Didi ka kryer detyrën e tij në atë aksion dhe ka treguar është gati të japë edhe jetën për të mbrojtur vendin e tij. "Didi është plagosur në një aksion për kapjen e disa bandave terroriste dhe video në fjalë dëshmon kurajon e tij, i cili ka ndërhyrë për të shpëtuar disa pasagjerë. Deputetët e Opozitës edhe pse shkelën rregulloren duke përdorur një sallë të kuvendit për interesat e tyre përsëri nuk e shfrytëzuan mirë pasi shfaqën një video ku e lartësuan figurën e drejtorit të Policisë së Shtetit", theksoi Balla.

Deputeti i Partisë Socialiste duke folur në emër të anëtarëve të PS-së në Komisioni theksoi se nga hetimet nuk është konstatuar ajo që deputetët e opozitës kërkonin prandaj, sipas Ballës Policia e Shtetit është sot më shumë se kurrë në krye të detyrës dhe për këtë në grupit parlamentar të PS-së ai i uroj punë të mbarë uniformave blu.

I menjëhershëm ka qenë edhe reagimi i deputetëve të opozitës, të cilët nëpërmjet Arben Ristanit jetësuan qëndrimin e tyre, duke publikuar edhe provat që Partia Demokratike kishte propozuar për ti bërë pjesë të hetimit.

Të mbledhur në sallën ku zakonisht bëhen mbledhjet e Komisionit Hetimor, Ristani saktësoi se “mbledhja nuk është zyrtare, pasi nuk kemi kuorumin e nevojshëm për të vijuar normalisht punën, por ne për hir të transparencës duam t’iu njohim me faktet që kemi posedim. Pikësëpari tha Ristani, na ka mbërritur një dokument i vitit 2004, me nënshkrim të Ministrit të asokohe, që i takonte Partisë Socialiste dhe ku ishin hetuar disa prej ish-drejtuesve të policisë së shtetit dhe që sipas dokumentit kanë shkelur ligjin asokohe, ndërsa sot janë ri-pranuar në Polici”, theksoi Ristani.

Më tej në Komisionin Hetimor u transmetua një video, në të cilën tregohej vrasja e një pengu, gjatë një rasti rrëmbimi të një autobusi nga një shqiptar. Në video shfaqeshin forcat e policisë shqiptare, të cilat vranë, shtetasin Flamur Pisilit, i cili në këtë rast ishte thjesht një peng. Ngjarja e pengmarrjes së një autobusi, nga një shqiptar, me pasagjer brenda ndodhi më 28 prill të vitit 1999. Sipas Ristani, personi që drejtonte operacionin e policisë shqiptare ishte vetë drejtori i Përgjithshëm i Policisë sot, Artan Didi.

Deputeti tjetër i Partisë Demokratike, Flamur Noka, tha se Didi shkeli ligjin dhe duhet të hetohet. “Artan Didi fshihet pas një krimi të rendë, pasi ka qenë pjesë e një operacioni ku u vra një peng, i pafajshëm. “Didi drejtonte operacionin, duke bërë të mundur kështu shkeljen e hapur të ligjit. Ndaj kërkojmë të hetohet kjo ngjarje, video e marrë nga një televizion grek dhe e pa shfaqur më parë. Duam drejtësi edhe për të vrarin”, theksoi gjatë fjalës së tij, ish-Ministri i Brendshëm, Flamur Noka.

Raporti i komisionit hetimor parlamentar

vijon

Dërgo me email | Stampo artikullin