29/04/2014 15:40:46

Një maratonë për autizmin

Sensibilizim për fëmijët me çregullime të spektrit autik

VLORE - Mjaft qytetarë iu bashkuan të martën, nismës së Everest Haxhit nga Vlora, për të marrë pjesë në një maratonë sensibilizuese për fëmijët me çregullime të spektrit autik. Duke nisur këtë aktivitet në orën 09.30, vrapuesit përshkuan segmentin Fier - Vlorë, me një gjatësi prej 36 km dhe mbërritën në qytetin bregdetar pak pas orës 14.00. Pavarësisht kushteve të papërshtatshme të motit, pjesëmarrësit në maratonën “Run4Dejan Run4Autism”, e vazhduan vrapimin, të ndjekur me dashamirësi nga drejtues të automjeteve që lëviznin në të dy kahjet e autostradës Fier-Vlorë. Kjo maratonë ishte nismë e qytetarit nga Vlora, Everest Haxhi, i cili është baba i një fëmije me çrregullime të spektrit autik, i cili u mbështet edhe nga gazetari Arbër Kadia dhe mjaft të tjerë. “Ai është heroi ynë dhe fytyra e mirësisë që çdo fëmijë si ai paraqet”, thotë Everest Haxhi, duke iu referuar fëmijës së vet, Dejanit, i cili të martën ka edhe ditëlindjen. Madje, kjo ditë e shënuar për Dejanin, i jep një simbolikë edhe më të veçantë këtij aktiviteti, që është i pari në llojin e vet që zhvillohet në Vlorë.

HermesNews - ©2014

Dërgo me email | Stampo artikullin