28/04/2014 11:44:24

Fillon puna për hartën e re

Qeveria brenda datave 16 maj - 19 maj sjell në komision disa variante të hartës së re të ndarjes territoriale

TIRANË - Komisioni i posaçëm për reformën administrativo - territoriale miraton programin e punës që do të shoqërojë veprimtarinë e tij deri në fund të mandatit dy mujor.

Kryetari i Komisionit, deputeti i PS-së, Bashkim Fino tha, "do i lëmë kohë qeverisë që brenda datave 16 maj - 19 maj të sjellë në komision disa variante të hartës së re të ndarjes territoriale. Më pas, komisioni do të vendosë se cilën prej tyre do të miratojë."

Në vijim, programi i punës parashikon një diskutim dymujor (20 maj-20 korrik) të hartës së re territoriale me zyrtarë vendore të komunave e bashkive në të gjithë vendin.

Pas këtij diskutimi, drafti do të vijë sërish në komision me vërejtje dhe sugjerime, për të marrë më pas dhe vendimin përfundimtar, i cili do t’i paraqitet Kuvendit.

Ministri për Çështjet Vendore, Bledi Çuçi tha se ai i plotëson më së miri kushtet kryesore, që janë transparenca, gjithëpërfshirja dhe respektimi i të gjitha kërkesave ligjore që lidhen me procesin e reformës administrativo-territoriale.

HermesNews - ©2014

Dërgo me email | Stampo artikullin