25/04/2014 17:47:01

Hiqen barrierat, një terminal doganor me kosovën

Kryeministri Rama tha se duhet të hiqen çmimet e referencës me Kosovën dhe se do të unifikohen çertifikatat sanitare mes dy vendeve tona. Një terminal i përbashkët doganor

TIRANE - Kryeministri Edi Rama gjatë një takimi me zyrtarë të qeverisë së Kosovës propozoi ngritjen e një terminali të përbashkët doganor mes Shqipërisë e Kosovës. Sipas tij, është më i lehtë shkëmbimi i mallrave mes Shqipërisë dhe Serbisë, sesa mes Shqipërisë dhe Kosovës. Problem është se, tregjet mes Shqipërisë dhe Kosovës qëndrojnë të izoluara dhe vështirësisht të aksesueshme. Kryeministri tha se se mes dy vendeve prej vitesh është ngritur një barrierë e lartë që pengon ndërveprimin dhe artificialisht i ka larguar. "Të fokusohemi në ambicien për të lehtësuar sipërmarrjen, tregtinë dhe lëvizjen e prodhimit mes dy vendeve. E pa mundur të shkojmë më tutje pa pasur një terminal të përbashkët doganor mes Shqipërisë dhe Kosovës. Krijimi i terminaleve të përbashkëta domosdoshmëri për të hapur procesin e lehtësimit në të gjitha aspektet. Rama tha se duhet të hiqen çmimet e referencës me Kosovën dhe se do të unifikohen certifikatat sanitare mes dy vendeve tona. Kryeministri u shpreh më tej se duhet t’i jepet fund radhëve të gjata që shoqërojnë doganat e Shqipërisë dhe Kosovës. Siç tha ai do të krijohet edhe një Këshill Ekonomik Kombëtar për të luftuar burokracinë në të dy vendet.

HermesNews - ©2014

Dërgo me email | Stampo artikullin