24/04/2014 18:25:12

Korrupsioni, fjalë dite në Kuvend

''Veç ish-Kryeministrit në sallën e Kuvendit ka dhe ish-ministra, që së bashku me doktorin vetëm falë kartës së deputetit nuk janë në gjykatë duke dhënë llogari për shkeljet e tyre, por që flasin për drejtësi, kur në kurriz mbajnë skandale të tilla si, Gërdeci me 24 viktima''

TIRANË - Ministri i Punëve të Brendshme, Saimir Tahiri tha sot nga foltorja e Kuvendit, në diskutimet për Pr/ligjin për deklarimin e pasurive në ILDKP nga zyrtarët e lartë, se "Nuk është e këndshme të dëgjosh ish-Kryeministrin të flas për luftën ndaj korrupsionit dhe për rëndësinë e transparencës, kur djali i tij është artikuluar disa herë për afera korruptive, ndërsa vajza e të cilit i dorëzoi një biznesmeni të ardhur nga larg për të investuar në vendin tonë një "faturë" shumë të shëndetshme si çelës të suksesit për biznesin e tij, duke shuar ëndrrat e shumë familjeve shqiptare për tu punësuar", tha Tahiri. "Veç ish-Kryeministrit në sallën e Kuvendit ka dhe ish-ministra, që së bashku me doktorin vetëm falë kartës së deputetit nuk janë në gjykatë duke dhënë llogari për shkeljet e tyre, por që flasin për drejtësi, kur në kurriz mbajnë skandale të tilla si, Gërdeci me 24 viktima…etj", shtoi ai. "Qeveria jonë, ka shkuar në Prokurori duke dërguar dosje për zyrtarët e lartë, por ju shkuat edhe në derën e qelisë së burgut për ta mbrojtur. Prandaj, kjo është arsyeja që ne duam ta reformojmë sistemin, për t'i dhënë pavarësi në vendimmarrje, që sistemi të funksionoj edhe jashtë dëshirës apo interesit tonë, duke qenë në karhë të qytetarëve, kjo është kryefjala në luftën ndaj korrupsionit. Politika e skajshme, nuk e ndihmon dot luftën ndaj korrupsionit, prandaj ju them hajde na vini në provë me fakte, jo me fjalë, pasi ne jemi të parët që duam të jemi në provë, por gjithmonë me fakte. Duam shtetin e së drejtës, shtetin e barazisë", përfundoi Tahiri.

HermesNews - ©2014

Dërgo me email | Stampo artikullin