21/04/2014 15:55:15

PD-së, bëhuni pjesë e reformave

''Nesër në Konferencën e Kryetarëve do të diskutojmë lidhur me iniciativën e grupit parlamentar të PS-së për të zhbllokuar komisionin e posaçëm. Natyrisht, për këtë çështje do të vendoset në seancën plenare të ditës së enjte, por ne shpresojmë të ketë një reflektim nga ana e opozitës''

TIRANË - Kryetari i Kuvendit, Ilir Meta i bëri sërish thirrje opozitës së djathtë që të reflektojë dhe të bëhet pjesë e komisionit të posaçëm për reformën administrativo-territoriale. Një ditë para mbledhjes së Konferencës së Kryetarëve, ku pritet të diskutohet propozimi i grupit parlamentar të Partisë Socialiste, që kërkon ndryshimin e projektvendimit për funksionimin e këtij komisioni, kryetari Meta ftoi opozitën që të ofrojë mirëkuptim për këtë reformë mjaft të rëndësishme. Ai theksoi se maxhoranca ka dëshmuar "një durim të hekurt për ta përfshirë opozitën maksimalisht në proces. Nesër në Konferencën e Kryetarëve do të diskutojmë lidhur me iniciativën e grupit parlamentar të PS-së për të zhbllokuar komisionin e posaçëm. Natyrisht, për këtë çështje do të vendoset në seancën plenare të ditës së enjte, por ne shpresojmë të ketë një reflektim nga ana e opozitës, e cila, i ka të gjitha mundësitë për të dhënë konsensusin dhe për ta kërkuar atë nga maxhoranca", tha Meta.

HermesNews - ©2014

Dërgo me email | Stampo artikullin