19/04/2014 15:29:41

Mazhoranca ndërron strategji. Jo prokurori, komision hetimor

Komision hetimor për akuzat. Depozitohet kërkesa e PS dhe LSI-së

TIRANE - Mazhoranca kërkon ngritjen e komisionit hetimor për zbardhjen e plotë të motiveve, verifikimin e plotë të fakteve që provojnë ose përgënjeshtrojnë akuzat e artikuluara publikisht nga përfaqësues të lartë politikë kundrejt FA për vënien në dispozicion të infrastrukturës së Ushtrisë për veprimtari kriminale, transport i lëndëve narkotike.

Kërkesa është depozituar nga grupet parlamentare të PS-së dhe LSI-së, sic njoftoi me anë të një deklarate për shtyp nënkryetari socialist i grupit, Taulant Balla.

"Zbardhja e plotë të motiveve dhe arsyeve, si dhe tregimin e fakteve dhe provave, mbi të cilat janë mbështetur këto akuza, kanë një rëndësi të vecantë për imazhin e Forcave të Armatosura të një vendi anëtar të NATO-s, në përmbushje të detyrimeve që rrjedh nga ky anëtarësim", thuhet në deklaratë.

Me ngritjen e komisonit, maxhoranca ka për qëllim dhe informimin e opinionit publik, për vërtetësinë ose pavërtetësinë e këtyre akuzave.

"Kërkohet të informohet opinioni publik për angazhimin që ka marrë përsipër Qeveria shqiptare, për të identifikuar dhe parandaluar cdo shfaqje dhe veprim korruptiv me pronat dhe infrastrukturën e Forcave të Armatosura si dhe në Ministrinë e Mbrojtjes, me qëllim rikthimin e dinjitetit të munguar dhe vendit që i takon Forcave Armatosura", thekson Balla në emër të shumicës parlamentare.

HermesNews - ©2014

Dërgo me email | Stampo artikullin