15/04/2014 15:15:24

Pse u vetëvar Bledari ?

Në kërkim të një identiteti të rrezikshëm. Çfarë mungoi me të vërtetë në jetën e minorenit ?

DURRES - Mund të ketë qenë një vetëvarje për arsye që ndoshta asnjëherë nuk do të zbulohen, por komshinjtë pëshpërisin me njeri-tjetrin. Ajo që çoi në vetëvarje 13 vjeçarin nga Durrësi është as më shumë as më pak se fletët e shpërndara nga Dëshmitarët e Jehovait dhe telenovelat turke në tv.

Bledari, djali i një emigranti, ishte vetëvarur brenda banesës. Ngjarja ndodhi sot në sektorin Rinia të qytetit. Deri atëherë fëmija kishte qenë duke luajtur me shokët.

Por cilat kanë qenë motivet që e kanë çuar 13 vjeçarin të imitojë në një mënyrë të pazakontë heronjtë e telenovelave, apo të ndjekë propagandën e një besimi që në thelbin e vet flet për një jetë më të mirë pas të ashtëquajturit apokalips në këtë botë, jo në botën tjetër ? Çfarë mangësish ka një minoren për të bërë një gjest të tillë ?

Psikologu i njohur Prof. Dr Ylli Pango për Hermesnews shpjegon: "Mosha e adoleshencës së hershme karakterizohet nga psikologjia e zhvillimit, si mosha më e panjohur, më problematike, më e papërcaktuar. Sidomos në aspektin e formimit të identitetit. Adoleshenti është në kërkim të një identiteti që konsiston në faktin se ende nuk di kush është në të vërtetë, çfarë përfaqëson, cili është uni i tij", thotë Pango.

Por çfarë ndodh me identitetin e një 13 vjeçari ? "Në këtë aspekt ai (adoleshenti) kërkon ta ndërtojë këtë identitet dhe duke mos pasur ende përvojën e duhur, imiton, përpiqet tu ngjasojë të tjerëve, sidomos figurave ideale, sportistëve, artistëve të njohur etj" thotë Pango.

A kanë influencë me të vërtetë mësimet e një besimi të interpretuar ndryshe ? "Në ndonjë rast figura ideale për t'u imituar, ndërtohet ndryshe: nëpërmjet predikimeve, botës së përfaqësuar a paraqitur syresh. Në këtë rast dhe vetëvarja shihet në një dritë tjetër, e thjeshtë, lehtësisht e imitueshme e që të çon në një botë tjetër më të mirë. Aq më shumë që duke e parë në filma a duke e dëgjuar në predikime, atë veprim (vetëvarjen) e atë botë që vjen prej tij, adoleshentët mendojnë se dhe ata që e zgjedhin atë rrugë, janë idealet e duhura për t'u ndjekur në udhën drejt kërkimit të një jete a identiteti të ri", thotë dr. Pango.

Me siguri, gjesti i 13 vjeçarit krijon shumë pikëpyetje në opinionin publik, por nëse nuk është një problem adoleshencial, duhet të kuptojmë nëse propaganda e një besimi apo interesa të mbylluara brenda telenovelave krijuan një dëshirë të parrezistueshme për të mbushur një boshllëk që realiteti i kishte krijuar. //HermesNews - ©2014//

Doriana Metollari

Dërgo me email | Stampo artikullin