08/04/2014 18:14:32

Të pathënat për Edmond Gogo-n

PD akuzon Tahirin: ''Edmond Gogo, ishte pjesë e trupit gjykues të Apelit, në fund të vitit 2012, kur vendosi të lërë në fuqi, vendimin e Gjykatës së Tiranës, që e dënonte Saimir Tahirin me 10 milionë lekë gjobë për shpifje''

TIRANË - Partia Demokratike, nëpërmjet deputetit të saj Oerd Bylykbashi, denoncoi të martën kërkesën e Ministrit të Brendshëm drejtuar Presidentit, për të marrë masa ndaj gjykatësit dhe njëherazi e akuzon Tahirin se po përdor postin e tij për t’u hakmarrë ndaj gjyqtarëve.

“Pak ditë më parë, Ministri Tahiri iu drejtua Presidentit të Republikës me letër të hapur, ku denonconte gjyqtarët dhe drejtësinë, në një përpjekje për të larguar përgjegjësinë që ai dhe kryeministri kanë për dështimin me rendin dhe sigurinë publike, dhe për rritjen e kriminalitetit në vend”, tha Bylykbashi

Deputeti, Bylykbashi theksoi se “Tahiri, qorton në letrën e tij publike, dhe i kërkon Presidentit të marrë masa ndaj gjyqtarit Edmond Gogo, pasi ky gjyqtar ishte pjesë e trupit gjykues të Apelit, në fund të vitit 2012, kur vendosi të lërë në fuqi, vendimin e Gjykatës së Tiranës, që e dënonte Saimir Tahirin me 10 milionë lekë gjobë për shpifje”.

Ky akt është një shenjë shumë e keqe për demokracinë në vend, është minim i sigurisë juridike, pavarësisë së gjyqësorit dhe shkatërrim i institucioneve të pavarura, është shantazh i hapur dhe paralajmërim për çdo gjyqtar dhe për drejtësinë në vend”, përfundon Bylykbashi.

HermesNews - ©2014

Dërgo me email | Stampo artikullin