08/04/2014 17:49:58

Rrezultatet financiare ne rritje

Sipas të dhënave të paaudituara nga Shoqata Shqiptare e Bankave, për dy muajt e parë të këtij viti, rezultati financiar i 16 bankave tregtare ishte me fitim në vlerën e rreth 3 miliardë lekëve

TIRANE - Sistemi bankar e ka nisur vitin 2014 me një rezultat financiar në rritje, ndonëse shkalla e kredive me probleme ende nuk po gjen dot një ulje të qëndrueshme.

Sipas të dhënave të paaudituara nga Shoqata Shqiptare e Bankave, për dy muajt e parë të këtij viti, rezultati financiar i 16 bankave tregtare ishte me fitim në vlerën e rreth 3 miliardë lekëve.

Krahasuar me të njëjtën periudhë të një viti më parë, rezultati i bankave është përmirësuar me afro 120%. Kthimi nga kapitali u rrit në afro 17%, nga më pak se 8% që ishte për dy muajt e parë të vitit 2013.

Niveli i mjaftueshmërisë së kapitalit është në kufijtë e 18%, më i larti prej më shumë se shtatë vjetësh. Ky është një fillim i mirë, sadoqë që është mjaft herët për të kuptuar rrugën që do të ndjekë sektori bankar gjatë këtij viti.

Kreditë me probleme ngelen një sfidë dhe në fund të Shkurtit ato përbënin 24.2% të totalit. Pasi një rënie deri në 23.3% në fund të vitit të kaluar, në dy muajt e parë të 2014 kreditë me probleme u kthyen shpejt sipër kufirit të 24%.

HermesNews - ©2014

Dërgo me email | Stampo artikullin