01/04/2014 16:33:03

Ndryshime në tatimin mbi të ardhurat

Gjatë prezantimit të draftit zv/ministri i Financave, Ervin Mete tha se ndryshimet ligjore lidhen me një rregullim specifik për borxhet e këqija

TIRANË - Komisioni parlamentar i Ligjeve miratoi të martën me konsensus disa shtesa dhe ndryshime në ligjin ”Për tatimin mbi të ardhurat”.

Gjatë prezantimit të draftit zv/ministri i Financave, Ervin Mete tha se ndryshimet ligjore lidhen me një rregullim specifik për borxhet e këqija ose siç njihen ndryshe kreditë e këqija të bankave.

“Rregullimi aktual fiskal, që praktikisht është për të njohur si shpenzim të zbritshëm një borxh të keq, duhet që të ketë ezauruar të gjitha mjetet ligjore. Kjo do të thotë se duhet të ketë kaluar në gjykatë edhe fazën e përmbarimit apo të ekzekutimit të detyrueshëm, që mund të marrë një kohë të gjatë dhe shpesh herë me vite”, tha zv/ministri Mete.
Sipas tij ndryshimet në ligj përcaktojnë nxjerrjen e borxhit të keq jashtë bilancit të bankave, i cili do të njihet si shpenzim i zbritshëm nga ana fiskale pas 365 ditësh.

“Duke pasur parasysh gjendjen e sektorit dhe numrin e lartë të kredive të këqija që sot bankat i kanë në masën 23.5-24 për qind, në kuadrin e një sërë masash të dakordësuara edhe me Bankën Botërore dhe të rënë dakord unanimisht dhe me sektorin e bankave, paraqesim këtë ndryshim, i cili specifikisht veçon sektorin e bankave në trajtimin fiskal të borxheve të këqija duke vendosur rregullin që një borxh i keq për bankat, do të mund të nxirret jashtë bilancit dhe të njihet si shpenzim i zbritshëm nga ana fiskale, pas 365 ditësh”, sqaroi z. Mete.

Zv/ministri i Financave theksoi se këto masa, jo vetëm do të ndihmojnë bankat në treguesit e performancës, por nga ana tjetër do të çlirojnë më tepër kredi në ekonomi.

HermesNews - ©2014

Dërgo me email | Stampo artikullin