31/03/2014 20:29:01

Prodhimet shqiptare së shpejti me vulë cilësie

Vula e cilësisë do të jepet nga Ministria e Bujqësisë; do t'i kurorëzojë prodhimet tona dhe do i rendisë ato sipas cilësisë së çdo produkti

TIRANE - Ministri i Bujqësisë, Zhvillimit Rural dhe Administrimit të Ujërave Edmond Panariti zhvilloi sot një vizitë në një supermarket në kuadër të nismës "Prodho shqip, tregto shqip, bli shqip", për të nxitur blerjen dhe konsumimin e produkteve shqiptare. Panariti tha se Ministria e Bujqësisë ka nisur një politikë krejtësisht të re përsa i përket sigurisë ushqimore, që synon një kontroll të sigurisë dhe cilësisë së ushqimit sipas një sistemi vertikal, nga "ferma në tavolinë". Për prodhimet shqiptare, tha Panariti së shpejti do te jetë vula e cilësisë, e cila do të jepet nga Ministria e Bujqësisë e cila do ti kurorëzojë prodhimet tona dhe do i rendisë ato sipas cilësisë së çdo produkti.Për vajin e ullirit, Ministri tha se së shpejti do nisin analizat dhe do sigurohemi që vaji i ullirit që tregtohet të jetë 100 % vaj ulliri i prodhuar nga ullinjtë tanë. "Ne do merremi me analizat e vajit dhe nuk duhet të lejojmë falsifikatorë të këtij prodhimi. Ulliri kalinjot, ulliri i Beratit, dhe ulliri i bardhë i Tiranës, kanë antioksidantë, lëndë antikancerogjene dhe me cilësi janë të pakonkurueshme nga mallrat e importit", tha Panariti.

HermesNews - ©2014

Dërgo me email | Stampo artikullin